קילערע וועטער און מעגליכע רעגן ערווארטעט אין ארץ ישראל אין די טעג פון חול המועד סוכות

א קילערע וועטער ווערט ערווארטעט איבער גאנץ ארץ ישראל דעם דינסטאג, מיט א מעגליכקייט פאר לייכטע רעגן אין געוויסע טיילן פון לאנד, בעת אידן האלטן אינמיטן פראווען די טעג פון חול המועד סוכות.

די טעמפעראטורן וועלן זיין נידריגער ווי געווענליך פאר די צייט פון יאר. די קילערע וועטער וועט זיך ספעציעל לאזן שפירן אין די פרימארגן און אוונט שטונדן פאר די וואס פארברענגען אין די סוכות.

לויט די פאראויסזאגונגען ווערט ערווארטעט רעגן אין צפון ארץ ישראל, און עס איז דא א מעגליכקייט פאר א לייכטע רעגן ביים ברעג פונעם ים.

אין ירושלים עיר הקודש וועט די טעמפעראטור גרייכן ארום 24 סעלסיוס (75 פערענהייט), בשעת אין תל אביב און חיפה וועט עס זיין ארום 28 סעלסיוס (82 פערענהייט), און אין טבריה וועט עס גרייכן ביז 30 סעלסיוס (86 פערענהייט).

די וואס פלאנירן ארויסצוגיין צום ים אין די חול המועד טעג דארפן נעמען אין אכט אז די אומשטענדן ביים מיטלענדישן ים זענען ערווארטעט צו זיין געפארפול פאר שווימער, מיט כוואליעס וואס וועלן גרייכן ארום 1.2 מעטער (ארום פיר פיס) הויך.

דאס פארוואלקנטע און רעלאטיוו קילע וועטער וועט ווייטער אנהאלטן אין די קומענדיגע טעג, מיט א מעגליכקייט פאר נאך לייכטע רעגן אין צפון און צענטראל ארץ ישראל. די טעמפעראטורן וועלן אנהייבן צוריק ארויפגיין ענדע וואך.