א שוידערליכער עקסידענט האט פאסירט אינעם מיאמי אינטערנאציאנאלן לופטפעלד דעם 6'טן סעפטעמבער 2026, ווען א באאינג 767-300 קארגא פליגער, אפערירט דורך '21 עיר' פאר 'אמאזאן פרעים עיר', האט אראפגעקראכט ביים ענדע פונעם ראנוועי און אריינגעשמעטערט אין צוויי אויטאס, איבערלאזנדיג 5 טויטע און עטליכע פארוואונדעטע.

דער פליגער, וואס איז געקומען צו פליען פון סאן כואן, פארטא ריקא, האט געלאנדעט אויף ראנוועי 30, אבער אנשטאט זיך אפשטעלן, האט עס ווייטער געפארן אינדרויסן פונעם לופטפעלד טעריטאריע, אריינקראכנדיג אין א ווען און א קאר. 5 מענטשן אין די אויטאס זענען אויפן ארט אומגעקומען, און נאך 5 אנדערע אויף דער ערד, אינאיינעם מיט די צוויי פיילאטס, זענען פארוואונדעט געווארן.

די 'נעשאנאל טראנספארטעישאן סעיפטי בארד' (NTSB) האט ארויסגעגעבן פרישע פלייט דאטא און אן אנימאציע וואס צייגט פונקטליך וואס עס האט זיך אפגעשפילט אין די לעצטע סעקונדעס. לויט די אויספארשער, האט דער פליגער געלאנדעט מיט א גאנץ הויכע ספיד. ארום 15 סעקונדעס נאכן לאנדן, בעת דער פליגער איז נאך געפארן מיט א שנעלקייט פון 120 נאטס, זענען די ברעיקס מיטאמאל ארויסגעלאזט געווארן און די מאטארן זענען ארויפגעריקט געווארן צו א הויכע קראפט, וואס צייגט אז די פיילאטס האבן פרובירט צו מאכן א 'גאו-עראונד' (זיך צוריק הייבן אין די לופטן). אבער בלויז עטליכע מאמענטן שפעטער האבן זיי צוריק אראפגענומען די קראפט און נאכאמאל אנגעצויגן די ברעיקס.

די דאטא צייגט אויך אז די פיילאטס האבן אינגאנצן נישט גענוצט די 'ספיד ברעיקס' אדער די 'טראסט ריווערסערס' - די סטאנדארטע סיסטעמען וואס העלפן אפשטעלן א פליגער נאכן לאנדן. דער פאקט אז די וויכטיגע ברעיקינג סיסטעמען זענען נישט גענוצט געווארן, קאמבינירט מיט די קורצע צייט וואס זיי האבן געגעבן גאז פאר א 'גאו-עראונד', האט איבערגעלאזט דעם שווערן קארגא פליגער אן קיין מעגליכקייט זיך אפצושטעלן אויפן פארבליבענעם שטח פונעם ראנוועי. דער פליגער האט אראפגעפארן פונעם געפלאסטערטן ראנוועי, אריבערגעפארן דעם צוים, און אריינגעקראכט אין די אויטאס בעפאר עס האט זיך אפגעשטעלט און אויפגעריסן אין פלאמען.

עמערדזשענסי רעספאנדערס זענען אנגעקומען צום סצענע און געטראפן דעם פליגער אין פלאמען, בשעת מענטשן זענען געווען פארכאפט אין די צוקוועטשטע אויטאס. מער ווי 60 פייער און רעטונג איינהייטן זענען ארויסגערופן געווארן צום קראך. אלע אפעראציעס אינעם לופטפעלד זענען אפגעשטעלט געווארן מיט א 'גראונד סטאפ' בעת די רעטונגס ארבעט איז אנגעגאנגען. ביידע פיילאטס האבן איבערגעלעבט דעם קראך און זענען שוין אויסגעפרעגט געווארן דורך די אויספארשער אלס טייל פונעם אנגייענדן אויספארשונג.

די NTSB פארזעצט צו אונטערזוכן די רעקארדירונגען פונעם קאקפיט, די עקספיריענס פון די פיילאטס, די סיסטעמען פונעם פליגער, און צי די וועג וויאזוי די קארגא איז געווען אנגעלאדנט האט מעגליך בייגעשטייערט צום עקסידענט. עוויעישאן עקספערטן ווייזן אן אז א שפעטע אדער האלב-וועגס באשלוס צו מאכן א 'גאו-עראונד' קען אוועקנעמען קריטישע ראנוועי לענג ביי א היי-ספיד לאנדונג. דער שרעקליכער עקסידענט האט געצויגן גרויס אויפמערקזאמקייט צו קארגא אפעראציעס אין גרויסע לופטפעלדער, און די פאמיליעס פון די קרבנות ווי אויך די עוויעישאן וועלט ווארטן מיט שפאנונג אויף ווייטערדיגע אפדעיטס פון די NTSB צו פארשטיין פונקטליך וואס האט געפירט צו דעם טראגישן קראך.