צוויי איראנער בירגער אנגעקלאגט אין ענגלאנד פארן פלאנירן א טעראר אטאקע קעגן די אידישע קהילה אין מאנטשעסטער

צוויי איראנער בירגער זענען אפיציעל אנגעקלאגט געווארן אין ענגלאנד איבער א שוידערליכע טעראר פלאן וואס האט געצילט די לאקאלע אידישע קהילה אין מאנטשעסטער. לויט די פראסעקיוטערס, האבן די פארדעכטיגטע שפיאנירט און נאכגעקוקט מעגליכע אידישע צילן, און האבן פלאנירט דורכצופירן אן אטאקע מיט א זעלבסט-געמאכטע באמבע.

די צוויי טעראריסטן, ראחמאן סאלעהי און סאלאם אכמאדיאן, זענען ארעסטירט געווארן דעם 20'סטן סעפטעמבער, ערב יום כיפור, נאך א לענגערע קאנטער-טעראריזם אויספארשונג אין די 'גרעיטער מאנטשעסטער' געגנט. די בריטישע פראסעקיוטערס האבן באשטעטיגט אז ביידע זענען אנגעקלאגט געווארן פארן זיך גרייטן דורכצופירן טעראר אקטן.

אין געריכט האבן די פראסעקיוטערס איבערגעגעבן אז די צוויי האבן אדורכגעפירט שפיאנאזש אויף צוויי הויפט צילן: די מאנטשעסטער אידישע מוזעאום און די היטאן פארק שול.

לויט די קלאגעס, האבן די מענער געהאט א דירעקטע פארבינדונג מיט א דריטע פערזאן וועלכער האט זיי געגעבן אינסטרוקציעס און געהאלפן קאארדינירן דעם גאנצן פלאן וויאזוי צו נוצן די אויפרייס מאטעריאלן. די אויטאריטעטן גלייבן אז דער דריטער פארשוין איז אויך אן איראנער בירגער און עס איז מעגליך אז ער אפערירט דירעקט פון איראן.

ביידע אנגעקלאגטע זענען פארהאלטן געווארן אין תפיסה אן קיין בעיל, און זענען ערווארטעט צו ערשיינען אין די 'אלד בעילי' קאורט אין לאנדאן דעם קומענדיגן 23'סטן אקטאבער. דערווייל האבן זיי נאך נישט אריינגעגעבן קיין אפיציעלע ענטפער צו די קלאגעס, און די באשולדיגונגען זענען נאך נישט אויפגעוויזן געווארן אין קאורט.

די בריטישע אויטאריטעטן האבן באטאנט אז די אויספארשונג גייט נאך אן אין פולן שוואונג, און האבן פרובירט צו בארואיגן די לאקאלע אידישע קהילה אז מען נעמט אלע נויטיגע שריט צו פארזיכערן זייער זיכערהייט נאך די שוידערליכע ארעסטן.