חסידי סקולען נעמען אויף מיט רגשי שמחה ונחמה, די פריידיגע מעלדונג איבער די
המשכת המלוכה, ווען יעצט ביינאכט איז אויסגערופן געווארן בבית מדרשו של רבי
אין סקולענער בית המדרש אין בארא פארק, אז בנו הגדול פונעם רבי'ן זצ"ל הרה"צ
ר' אהרן מאיר פארטוגאל שליט"א ווערט אויפגענומען אלס ממלא מקומו בקודש אלס
"אדמו"ר מסקולען".

יעצט אויפדערנאכט נאך תפילת מעריב אין סקולענער בית המדרש אין בארא פארק, האט
הרב החסיד המפואר ר' אלי' דייטש הי"ו לאנגיעריגער משמש בקודש אין ביהמ"ד
סקולען אין וויליאמסבורג, אויסגערופן אין נאמען פון די קהילות הקודש אין בארא
פארק און וויליאמסבורג, אז בנו הגדול פונעם רבי'ן זצ"ל הרה"צ ר' אהרן מאיר
פארטוגאל שליט"א ווערט אויפגענומען אלס ממלא מקומו בקודש, ער זאל מאריך ימים
זיין על ממלכתו געזונטערהייט, און קענען משפיע זיין פאר אידישע קינדער אויף די
ווייטערדיגע דורות.

הרה"ח ר' אלי' דייטש הי"ו דינט שוין לאנגע יארן אלס משמש בקודש אין סקולען,
נאך ביי הרה"ק בעל נועם אליעזר זי"ע, דערנאך ביי הרה"ק מסקולען  זי"ע,
און דערנאך ביים רבי'ן זצ"ל. בעפאר די הכתרה האט ער איבערגעגעבן א קוויטל פארן
נייעם רבי'ן שליט"א זיך מזכיר צו זיין לטובה ולברכה, און כ"ק אדמו"ר מסקולען
לעיקוואד שליט"א האט זיך אנגערופן אז ר' אלי' האט א כח צו שטיין על המשמר נאך
פונעם זיידן זצ"ל, נאך פונעם טאטן זצ"ל, און דערנאך ביים ברודער דער רבי זצ"ל.

הרה"צ ר' אהרן מאיר שליט"א איז דער עלטסטער זון פון כ"ק אדמו"ר הרה"ק מהר"יי מסקולען
זצ"ל, און עלטסטע אייניקל בן אחר בן פון הרה"ק מסקולען זי"ע,
ער איז אן איידעם ביי זיין פעטער הגה"צ ר' שלמה אליעזר ברוינשטיין שליט"א
אבד"ק טערניווא, איידעם ביי הגה"צ אבד"ק טעטש זצ"ל חותן המלך פונעם רבי'ן זצ"ל.

דער נייער רבי שליט"א איז באקאנט מיט זיין גדלות בתורה און ענוות חן, שייף
עייל ושייף נפיק ולא מחזיק טיבותא לנפשיה, מלא וגדוש בתורה וחסידות און יראת
שמים. זייענדיג א איידעם אין מאנסי האט ער דארט קובע געווען מקום מושבו, און
מיטן אויבערשטנס הילף וועט ער זיך אריבערציען אין די נאנטע תקופה אנצופירן די
עדה הקדושה פונדערנאנט לשם ולתפארת.

תיכף נאך די הכתרה האט הרה"ח ר' יהושע פיש הי"ו מנכבדי קהילה קדושה סקולען
אויסגערופן, אז דער צווייטער זון פונעם רבי'ן זצ"ל הרה"צ ר' אליעזר זוסיא
פארטוגאל שליט"א וועלכער איז אן איידעם ביי כ"ק אדמו"ר מטשערנאביל שליט"א,
ווערט אויך אויפגענומען למלא מקומו בקודש באדמורו"ת, און אויף די פלאץ וואו ער
וועט זיך בעז"ה מסדר זיין זאל ער האבן גרויס הצלחה.