בארא פארק, נ.י. – די בארא פארקער גאסן טומלען און רוישן, די שטאט איז איינגעהילט אין שפאנונג ווארטנדיג אויפן נאכט פון ליכטיגקייט, דער דינער וואס איז שוין באקאנט מידי שנה בשנה צו טיילן השפעות פאר עניי ארץ ישראל, און ברענגען השפעות פאר די תומכים ומחזיקים – דעם קומענדיגן מיטוואך פרשת במדבר, ר"ח סיון הבעל"ט.

די גאסן זענען באדעקט מיט רעקלאמעס וועלכע ברענגען ארויס דעם קריטישן וויכטיגקייט פון די ברייטפארצווייגטע פעולות הקודש פונעם הייליגן קופת הצדקה וועלכע דינט שוין אלס לייכט-טורעם און רעטונגס שיפל פאר טויזענטער משפחות עניים ואביונים אין ארץ ישראל פאר קרוב צו צוויי הונדערט יאר.

דער בארא פארקער דינער האט זיך אנטוויקלט אלס איינס פון די גרעסטע הכנסות פאר דעם הייליגן קופה, צייגנדגי די געוואלדיגע ווארעמקייט וואס יהדות בארא פארק האט פאר דעם הייליגן צוועק.
דער דינער דאס יאר וועט פארקומען אין די גיגאנטישע זאלן פונעם עלעגאנטן אולם הייטנער, וועלכע ווערט הערליך באצירט אויפצונעמען דעם פילקעפיגן ציבור פון טויזענטער תושבי בארא פארק וועלכע זענען ערווארטעט זיך צו באטייליגן סיי בגוף און סיי בממון מיט הערליכע סכומים.

א הערליכער בימת הכבוד ווערט צוגעגרייט פאר די הונדערטער רבנים, אדמורי"ם, ומנהיגי הדור וועלכע וועלן זיך אי"ה באטייליגן ובראשם כ"ק האדמורי"ם נשיאי הכולל שליט"א.

ביים דינער וועלן די פארזאמלטע זיך דערקוויקן דאס הארץ מיט די פערל ווערטער פונעם נואם הכבוד, דער בארימטער מגיד מישרים הגה"צ רבי מאיר צוויבל שליט"א אב"ד קדושת יו"ט סאטמאר. ווי אויך וועט מען הערן דעם דבר הכולל פונעם לאנגיעריגן איבערגעגעבענעם מנהל הכולל, הרה"צ רבי ישכר בעריש רובין שליט"א האדמו"ר מדאמבראווא.

די הויעכפונקט פונעם אווענט וועט זיין אן אינהאלטסרייכע פאנעל "מאחורי הפרגוד", וואו די באטייליגטע וועלן האבן די געלעגנהייט צו הערן ערשטהאנטיגע באריכטן פון די קריטישע פעולות הקודש פונעם קופת הצדקה, א נושא וואס ווערט פילמאל פארקוקט, און די תומכי הקופה באקומען נישט אפט דעם געלעגנהייט צו הערן ערשטהאנטיג פון צוויי פון די חברי הנהלת כולל חבת ירושלים אין ארה"ק הרה"ג רבי יצחק לייב שרייבר-סופר שליט"א, און הרה"ח רבי ראובן ברייש שליט"א וועלכע קומען ספעציעל צו פארן פון ארץ ישראל מיטצוטיילן מיט תושבי בארא פארק איבער די קריטישע אקטיוויטעטן וואס שפילט זיך אפ מידי יום ביומו אינערהאלב דעם ממלכת החסד, וואס קען בלויז צושטאנד קומען אדאנק די הערליכע נתינות פון די געטרייע תומכים.

ווי שוין פריער באריכטעט איז דער הייליגער רבי מאיר בעל הנס פושקע נישט בלויז א הייליגער סגולה פון שרפי מעלה, נאר עס איז א מאלטי-מיליאן דאלערדיגן לעבנס-ליניע פאר בערך פופציג טויזענט נפשות וועלכע זענען אנגעוויזן אויף די תמיכה פון דעם קופה צו קענען אנגיין מיט זייער לעבן, צו דאס איז דעקן די קאסטן פון א דאקטאר וואס איז נישט געדעקט דורך די אינשורעס, צו דאס איז הוצאות החתונה פון א קינד, צו אויסשטאפירן א ניי-געבוירן קינד, אדער צו דאס איז פשוט געלט צו קענען אנגיין מיטן טאג-טעגליכן לעבן.

דער דינער היי-יאר איז מוקדש לע"נ אן אומפארגעסליכער ידיד נאמן , גזבר וחבר הנהלת הכולל, א איד וואס האט געלעבט און גע'אטעמט דעם כולל הרב רבי אלימלך לאופער ז"ל וזוגתו מרת פרומעט שינדל ע"ה. ווי אויך וועלן ביים דינער באעהרט ווערן מערערע ידידי ועסקני הכולל כל אחד בשמו הטוב יבורך מיט פארשידענע ערליך פארדינטע נזרי הקודש, כי להם נאה כי להם נאה נזר תפארה.
דורכאויס דעם גאנצן אווענט וועלן די באטייליגטע זיך דעקוויקן מיט א הערליכע מוזיקאלישע פארשטעלונג פון אלטע נאסטאלגישע חסיד'ישע ניגונים, הערליך איבער געזינגען דורכן בארימטן חסיד'ישן בעל מנגן מו"ה ר' שלמה זלמן הורוויץ הי"ו אין באגלייטונג פון די באקאנטע מקהלת וויזניץ.

ביים דינער וועלן אלע באטייליגטע אנטפאנגען ווערן דורך די געטרייע גבאי קודש וועלכע זענען א פראמינענטע חלק פונעם אור אלטן צדקה, וואס ווי באקאנט זענען די גבאי קודש פון רבי מאיר בעל הנס במשך הדורות געווען די פאן-טרעגער וועלכע האבן איבער געפירט דעם הייליגן מסורה מדור דור.
בארא פארק ווארט מיט שפאנונג צו דעם לעכטיגן נאכט. אלקא דמאיר ענני!