קאנטער-טעראריזם אגענטורן אין אויסטראליע האבן געעפנט אן אפיציעלע אויספארשונג איבער די הינטערגרונט און פארבינדונגען פונעם 'פליי-דובאי' קא-פילאט, וועלכער איז אנגעקלאגט געווארן אין דורכפירן א טעראר אטאקע אויף א פלייט וואס איז געווען אויפן וועג קיין תל אביב.

די לאקאלע קאנטער-טעראריזם אפטיילונג אין וויקטאריע, וואס רעכנט אריין די אויסטראלישע פעדעראלע פאליציי און די ארטיגע שפיאנאזש אגענטורן, האבן באשטעטיגט אז זיי פארשן אויס די פארבינדונגען וואס דער טעראריסט, כאמאם אל-כאמאמי, האט געהאט מיט אויסטראליע.

אל-כאמאמי האט אין די פארגאנגענהייט שטודירט אינזשעניריע אין די 'RMIT' אוניווערסיטעט אין מעלבורן. די אוניווערסיטעט האט באשטעטיגט אז ער האט טאקע געלערנט דארט, אבער האט איבערגעלאזט די שולע אן ענדיגן זיינע שטודיעס. די אויטאריטעטן גראבן יעצט אריין אין זיינע אקטיוויטעטן דורכאויס די יארן וואס ער האט זיך אויפגעהאלטן אין אויסטראליע.

דער קא-פילאט ווערט באשולדיגט אז ער האט אטאקירט דעם הויפט פילאט פון די 'פליי-דובאי' פלייט FZ1073 מיט א האק וואס ליגט אינעם קאקפיט פאר עמערדזשענסיס, און האט פרובירט איבערצונעמען קאנטראל פונעם פליגער בעת עס איז געפארן פון דובאי קיין תל אביב. פראקורארן אין די פאראייניגטע אראבישע עמיראטן (UAE) האבן אפיציעל אראפגעשטעלט דעם אינצידענט אלס א פרובירטע טעראר אטאקע.

א דאנק די פאסאזשירן און מאנשאפט מיטגלידער וועלכע האבן זיך אריינגעמישט און אים באוויזן צו איבערקומען, האט מען צוריק באקומען קאנטראל אויפן פליגער, און מען האט דורכגעפירט אן עמערדזשענסי לאנדונג אין סאודי אראביע.