טראגישע עקסידענט אין טעקסאס: גארבידזש טראק קראכט אריין אין הייוועי בריק; דרייווער טויט און פאסאזשיר קריטיש

א טראגישע עקסידענט האט פאסירט מיטוואך אוונט אין פארט וואורט, טעקסאס, ווען א גארבידזש טראק האט זיך ארויסגעגליטשט פונעם וועג און אריינגעשמעטערט מיט א געוואלדיגע קראפט אין די שטיצערס פון א הייוועי בריק, איבערלאזנדיג דעם דרייווער טויט אויפ'ן ארט.

לויט די ארטיגע פאליציי, האט דער טראק אראפגעפארן פון די יו-עס 287 הייוועי (אויך באקאנט אלס די מארטין לוטער קינג פריוועי) ווען עס האט פלוצלינג אריינגעקראכט אין עטלעכע זיילן וואס האלטן אונטער דעם בריק העכער 'איראט סטריט', און האט אינגאנצן צובראכן איינע פון די קאנקריט שטיצערס.

דער קראפט פונעם צוזאמענשטויס איז געווען אזוי שטארק אז דער דרייווער איז ארויסגעפלויגן פונעם טראק און איז ליידער דערקלערט געווארן טויט אויפ'ן סצענע. א פאסאזשיר וואס איז מיטגעפארן מיט אים איז אפגעפירט געווארן אין שפיטאל אין א קריטישן צושטאנד. די אידענטיטעט פון די צוויי זענען דערווייל נישט פובליצירט געווארן ביז מען וועט אינפארמירן זייערע פאמיליעס. אינוועסטיגעיטארס ארבעטן נאך צו דערגיין וואס האט געפירט דערצו אז דער טראק זאל פארלירן קאנטראל און אראפפארן פונעם וועג.

דער עקסידענט האט אנגעמאכט ערנסטע שאדנס צום בריק, וואס האט געצווינגען די באאמטע צו אינגאנצן אפשפארן די 287 הייוועי אין ביידע ריכטונגען, בעת אינזשענירן און קאנסטראקשן ארבעטער שאצן אפ צי די סטרוקטור איז נאך זיכער. די פארט וואורט פאליציי גיט איבער אז די הויפט הייוועי ליניעס וועלן זיך ערווארטעט צוריק עפענען אין ארום זיבן ביז צען טעג, איינמאל מען וועט באשטעטיגן אז דער בריק איז סטאביל. אבער די פולע פאריכטונגען צום געשעדיגטן בריק זעלבסט וועט זיך ווארשיינליך ציען ביז אריין אין אקטאבער.

דערווייל ווערט דער טראפיק פארקערט אויף אנדערע וועגן. קארס וואס פארן סאוטבאונד ווערן אראפגעפירט ביי בערי סטריט, און די נארטבאונד טראפיק ווערט אראפגעפירט נעבן ווילבארגער סטריט, וואס ברענגט שווערע טראפיק און פארהאלטונגען אויף די געווענליך-פארנומענע גאסן. די פאליציי בעט פון אלע דרייווערס צו נוצן אנדערע רוטס ביז די געגנט וועט ווערן דערקלערט אלס זיכער און צוריק געעפנט ווערן.