תפילות בייטאג קערן זיך צוריק צום קבר יוסף אין שכם אונטער נייע אראנזשירונגען
גאלערי
היסטארישע טוישונגען ביים קבר יוסף הצדיק אין שכם: צוטריט ערלויבט בייטאג נאך יארן פון שטרענגע באגרעניצונגען
גרויסע און היסטארישע טוישונגען קומען איצט פאר ביים קבר פון יוסף הצדיק אין שכם, נאכדעם וואס ארגאניזירטע באזוכן ווערן שוין ערלויבט דורכאויס די טאג-צייט שטונדן. דאס קומט נאך לאנגע יארן וואס דער צוטריט צום ציון איז געווען שטרענג באגרעניצט און כמעט בלויז ערלויבט אין די טיפע נאכט שטונדן.
נתנאל שניר, דער דירעקטאר פון די 'קבר יוסף אדמיניסטראציע', האט איבערגעגעבן אז א דאנק די נייע ארדענונגען האבן שוין טויזנטער מתפללים געהאט די זכיה צו באזוכן און מתפלל זיין ביים מקום קדוש אינמיטן העלן טאג.
די נייע אנטוויקלונג באצייכנט א גאר באדייטנדע טויש פאר די פילע אידן וואס שטרעבן צו קומען מתפלל זיין ביים קבר יוסף. אין ליכט פון די סוקסעספולע טאג-באזוכן, ווערט שוין איצט געפלאנט נאך א גרויסע ארגאניזירטע נסיעה און צאמקום פון מתפללים אויפן קומענדיגן יו"ט חנוכה הבעל טובה.