דראמאטישע עמערדזשענסי לאנדונג אין טאנזאניע נאכדעם וואס א פליגער האט זיך אנגעשטויסן אין א זעברע

א רוטינע סאפארי פליגער רייזע האט זיך פארוואנדלט אין א דראמאטישע עמערדזשענסי, נאכדעם וואס א 'סינדבארד עיר' עמברעאר EMB-120 פליגער האט אריינגעקראכט און אומגעברענגט א זעברע בעת'ן זיך הייבן פונעם סעראנערא עירסטריפ אין הארץ פונעם סערענגעטי נאציאנאלן פארק אין טאנזאניע, דעם פארגאנגענעם אקטאבער 4.

דער פליגער, וואס האט געהאט אויף זיך 26 פאסאזשירן און 4 מאנשאפט מיטגלידער און איז געווען אויפן וועג קיין זאנזיבאר, האט געליטן שווערע שאדנס צו די הויפט לענדינג גיר (רעדער) אינעם צוזאמענשטויס. דאס האט געצווינגען די פילאטן צו טוישן די רוטע און פארפארן ארום 270 קילאמעטער קיין מזרח צום 'קילימאנדזשארא אינטערנאציאנאלע עירפארט'.

ווען דער פליגער האט זיך דערנענטערט צום עירפארט, האבן די פילאטן באמערקט אז די רעדער קענען זיך נישט אראפלאזן, לאזנדיג זיי אן קיין אנדערע ברירה נאר צו גרייטן די קאבינע פאר א געפארפולע "בויך-לאנדונג" (אן די רעדער) אויף ראנוועי 09.

שוידערליכע ווידעא פונעם סצענע צייגט ווי דער פליגער גליטשט זיך אויפן ראנוועי אויף זיין בויך, מיט רויך און שטיקער פליענדיג אונטער אים ביז ער קומט צו א פולשטענדיגן אפשטעל. בחסדי השם, טראץ די דראמאטישע לאנדונג וואס האט איבערגעלאזט דעם פליגער מיט גרויסע שאדנס, זענען אלע 30 מענטשן ארויס אומבאשעדיגט אן קיין קראץ. די ראנוועי איז געווען פארמאכט פאר א קורצע צייט בשעת די עמערדזשענסי אגענטורן האבן אפגערומט דעם פליגער.

דער אינצידענט ווערט יעצט אויסגעפארשט דורך די טאנזאניע אוויאציע אטאריטיס. דער פאל ברענגט ארויס די כסדר'דיגע סכנה ביי די ווייטע סאפארי עירסטריפס ווי סעראנערא, וואו ווילדע חיות דרייען זיך פריי ארום די ראנוועיס אן קיין צוימען, און צוזאמענשטויסן מיט חיות בלייבט א שטענדיגע ריזיקע פאר קליינע פליגערס וואס פארן אריין און ארויס פון די געגענטער.