בס"ד

הויפט פון די יו-ען נוקלעארע אגענטור באזוכט געהיימע סירישע נוקלעארע איינריכטונגען פונעם געוועזענעם רעזשים

דער דירעקטאר דזשענעראל פון די אינטערנאציאנאלע אטאמישע ענערגיע אגענטור (IAEA), ראפאעל גראסי, האט די וואך אפגעשטאט א היסטארישן באזוך ביי וויכטיגע נוקלעארע לאקאציעס אין סיריע, אלס א טייל פון די באמיאונגען צו לייזן לאנג-פארצויגענע פראגעס איבער זייער נוקלעארע פראגראם. דער באזוך האט אריינגערעכנט די 'דייר א-זור' לאקאציע, וואו עס איז אמאל געשטאנען א פארדעכטיגטע נוקלעארע רעאקטאר בעפאר עס איז פארניכטעט געווארן, ווי אויך א צווייטע פלאץ וואו די סירישע אויטאריטעטן האבן לעצטנס אנטפלעקט אז זיי פארמאגן דארט נוקלעארע מאטעריאל.

דאס איז די גרעסטע פארשריט ביז יעצט צו אדרעסירן די אומדערקלערטע אקטיוויטעטן וואס האבן זיך אנגעהויבן אונטערן פריערדיגן רעזשים. גראסי'ס טיעם האט מיטגעהאלטן גראבונגען ביי דייר א-זור און דורכגעפירט אן ערשטע אינספעקציע אויף די ניי-געפונענע מאטעריאל.

סיריע האט אפיציעל דערקלערט די עקזיסטענץ פון נוקלעארע מאטעריאל ביי א פריער-געהיימע לאקאציע דעם 17'טן יולי 2026. לויט די אגענטור, רעכנט דאס אריין עטליכע טאן פון נאטורליכע אוראניום וואס מוז יעצט ווערן אונטערגעשטעלט אונטער אינטערנאציאנאלע אויפזיכט. א געמיינזאמע סטעיטמענט האט באשטעטיגט אז מען איז געקומען צו אן אגרימענט איבער פראקטישע אינספעקציע שריט, ווייטערדיגע צוטריט, און סיריע'ס צוזאג פאר פולע קאאפעראציע. די אגענטור וועט איבערגעבן אירע געפינענסן פאר די באורד אוו גאווערנארס. באאמטע האבן אויך פארהאנדלט איבער א ברייטערע קאאפעראציע פאר פרידליכע נוקלעארע באנוץ, איינמאל די אלע אישו'ס וועלן ווערן פולשטענדיג געלייזט.

די דייר א-זור לאקאציע איז שוין לאנג פארבונדן מיט די געהיימע נוקלעארע אמביציעס פון סיריע אונטערן געוועזענעם אסאד רעזשים. די איינריכטונג איז פארניכטעט געווארן אין א מדינת ישראל לופט-אטאקע אין יאר 2007, וואס האט פארהיטן דאס גענצליכע בויען פון א רעאקטאר וואס וואלט לויט די מערב-וועלט שפיאנאזש אגענטורן געקענט פראדוצירן מאטעריאל פאר נוקלעארע וואפן. פראגעס איבער פארבליבענע מאטעריאלן און מעגליכע קאאפעראציע מיט אנדערע לענדער זענען געבליבן אומפארענטפערט פאר יארן לאנג. די יעצטיגע צוטריט און גראבונגען זענען א געלעגנהייט צו ענדליך פארמאכן די קעיס, בתנאי אז די דורכזיכטיגקייט וועט זיין פולשטענדיג.

א פולע און שטרענגע אינספעקציע בלייבט קריטיש וויכטיג. סיי וועלכע נוקלעארע מאטעריאל וואס איז איבערגעבליבן פון די אמאליגע געהיימע פראגראמען טראגט מיט זיך א געפאר אויב עס ווערט נישט געהעריג באוואכט און קאנטראלירט. די אנוועזנהייט פון די IAEA און די קאאפעראציע פונעם סירישן רעזשים זענען פאזיטיווע שריט, אבער די היסטאריע צייגט אז האלב-דערקלערטע אינפארמאציע אדער באגרעניצטע צוטריט קען איבערלאזן געפארפולע לעכער. א נאכאנאנדע אינטערנאציאנאלע אויפזיכט איז נויטיג צו פארזיכערן אז סיריע'ס נוקלעארע פייל ווערט ענדליך גענצליך פארמאכט און אז קיין שום איבערגעבליבענע נוקלעארע מעגליכקייטן זאלן נישט סטראשען די זיכערהייט פונעם ראיאן.