כמעט דריי יאר נאכדעם וואס כאמאס טעראריסטן האבן דורכגעבראכן די גרעניצן און דורכגעפירט די שרעקליכסטע אטאקע אין די היסטאריע פון מדינת ישראל, האט די מדינת ישראל מיליטער געמאלדן איבער די באזייטיגונג פון נאך א קאמאנדיר וואס האט אנטיילגענומען אין דעם בלוטיגן מאסאקער.

די מיליטער האט באשטעטיגט אז אבד על-פאטאח אבו אל-עיש, א הויכראנגיקער קאמאנדיר אין די עליטע 'נוכבא' קראפטן פון כאמאס, איז אומגעקומען אין א לופט-סטראיק אין די דזשאבאליע געגנט אין צפון עזה. לויט די מיליטער, האט אבו אל-עיש פערזענליך אריינגעדרונגען אין מדינת ישראל טעריטאריע אום שמחת תורה, בעפאר ער איז צוריקגעלאפן קיין עזה וואו ער האט ווייטער אנגעפירט מיט טעראר אקטיוויטעטן אין די כאמאס רייען. אינאיינעם מיט אים איז אויך אומגעקומען ראעד עליאן, אן אפעראטיוו אין די מיליטערישע פליגל פון כאמאס.

מדינת ישראל באאמטע האבן איבערגעגעבן אז די צוויי טעראריסטן זענען געצילט געווארן נאכדעם וואס שפיאנאזש האט אנגעוויזן אז זיי האבן לעצטנס געארבעט פלייסיג פאראויסצורוקן פרישע טעראר אטאקעס קעגן צה"ל זעלנער און ציווילע בירגער. די מיליטער האט צוגעגעבן אז ביידע האבן אקטיוו פארלעצט די יעצטיגע סיספייער אפמאך, ניצנדיג די רואיגקייט איבערצובויען זייערע טעראר אפעראציעס אנשטאט אראפצולייגן די געווער. די סטראטעגיע פון צילן טעראריסטן וואס האבן סיי אנטיילגענומען אין די ארגינעלע אטאקע און סיי ווייטער אנגעגאנגען מיט טעראר, איז געווארן א הויפט טייל פון די אנגייענדע קאמפיין קעגן די איבערגעבליבענע כאמאס אינפראסטרוקטור אין עזה.

דער לעצטער לופט-סטראיק איז ווייט פון אן איינצלינער אינצידענט. בלויז עטליכע טעג בעפאר האט די מיליטער געמאלדן איבער די באזייטיגונג פון האני אבד אל-האי פאכרי מאזלום, א נוכבא קאמאנדיר, און כאסאן זידאן כאסאן דעירי, א סנייפער אין די כאמאס רייען, וועלכע זענען ביידע באשולדיגט געווארן אין שמוגלען געווער פאר די טעראר גרופע. די כסדר'דיגע אפעראציעס צייגן אן א ברייטערע און אומאויפהערליכע קאמפיין דורך די מיליטער סיסטעמאטיש אויפצוזוכן יעדן איינעם וואס איז געווען פארמישט אין די שמחת תורה אטאקעס, אומאפהענגיג וויפיל צייט עס איז שוין אריבער. דער צה"ל טשיף אוו סטעף, איאל זאמיר, האט עפנטליך איבערגעחזר'ט דעם צוזאג, שווערנדיג אז יעדער וואס האט אנטיילגענומען אינעם מאסאקער וועט עווענטועל געפינען און באזייטיגט ווערן.

פאר די משפחות פון די קרבנות און די פארכאפטע משכונות, דינט יעדע אזא מעלדונג ווי א שווערע אבער קלארע דערמאנונג אז דער שאטן פון די מלחמה איז נאך ווייט פון פאריבער, אפילו ווען די אקטיווע שלאכטן זענען אריין אין א נייע פאזע. פאר די מיליטערישע פירערשאפט ווערן די אפעראציעס באטראכט נישט בלויז ווי א נקמה אקט, נאר ווי א וויכטיגע זיכערהייט געברויך, מיטן ציל צו פארמיידן די געוועזענע טעראריסטן פון זיך צוריק גרופירן אדער פלאנירן צוקונפטיגע אטאקעס. יעצט ווען מען דערנענטערט זיך צום דריטן יאר-טאג פונעם מאסאקער, צייגן די אנגייענדע אטאקעס אז די געיעג נאך די שולדיגע איז נאך ווייט פון פארטיג, ווען נייע נעמען ווערן צוגעלייגט צו די ליסטע פון באזייטיגטע כמעט אויף א וועכנטליכע באזע.