די וואך איז פייערליך אפגעראכטן געווארן די שמחת החתונה פון די כלה, אן אייניקל פון כ"ק אדמו"ר מוויזניץ שליט"א, א טאכטער ביי זיין זון הגה"צ רבי יעקב מרדכי האגער שליט"א, אב"ד וויזניץ אלעד.

דער חתן איז א זון פון הרה"ג רבי פנחס ערנסטער שליט"א, אן אייניקל פון הגה"צ רבי אליעזר ערנסטער שליט"א, רב פון קרית מאור החיים אין צפת, און פון הגה"צ רבי חיים היילפרין שליט"א, רב קהילת 'דברי חיים' אין גאלדערס גרין אין לאנדאן.

די שמחה איז געפראוועט געווארן אינעם נייעם זאל "היכל דיצה וחדווה" וואס געפינט זיך אינעם 'בית וויזניץ' בנין. דער זאל איז מנדב געווארן דורך הרה"ג רבי נחמן מענדל שליט"א, לעילוי נשמת זיין חשוב'ע רעביצין ע"ה.

במשך פון די שמחה האט דער וויזניצער רבי שליט"א שטארק מעודד געווען די שירה וזמרה מיט גרויס ברען. באזונדער האט זיך עס אנגעזען ביים זינגען דעם באקאנטן ניגון שמחה 'תמיד שטענדיג פרייליך זיין', אין וועלכע דער רבי האט מיט די ווערטער מרמז געווען אויפן יאר תשפ"ז.