לבנון - אין א גאר ווייטאגליכע און אומגעווענליכע אינצידענט איז דער באקאנטער אויספארשער און היסטאריקער זאב חנוך (ז׳אבו) ערליך הי"ד אומגעקומען אויפן שלאכטפעלד אין לבנון דורך כיזבאללא טעראריסטן אין עלטער פון 71 יאר, נאך וואס ער איז אריין קיין לבנון מיט א גרופע זעלנער צו זען פון דער נאנט היסטארישע ערטער נעבן די שאמא דערפל, וואו ער איז ל”ע אומגעקומען ווען צוויי טעראריסטן האבן געעפנט פייער אין די ארכעאלאגישע ארט.

ער איז געבוירן צו זיין פאטער דער חוקר ר׳ ישראל ערליך ע"ה וואס שטאמט פון חסידי סוכאטשוב, ר׳ ישראל האט דורכאויס זיינע יארן ארויסגעגעבן צענדליגע ספרים אויף חסידי'שע היסטאריע.

זיין זוהן זאב האט ווייטער ממשיך געווען זיין פאטער'ס ארבעט און געפארשט צענדליגע היסטארישע ערטער אין ארץ ישראל, ער איז געווען א גרויסע מומחה אין קברי צדיקים און שוהלן און געדינט אלס א טוריזם באגלייטער, צייגנדיג היסטארישע ערטער.

זיין אומקום איז אויפגענומען געווארן מיט שאק סיי צוליב וואס ער איז געווען א באקאנטער פערזענליכקייט און סיי צוליב זיין עלטער זייענדיג די עלטסטע טויטפאל אויפן שלאכטפעלד, די מיליטער האט געפענט א גרונטליכע אויספארשונג צו דערגיין ווער עס האט אים געגעבן ערלויבעניש צו אריינגיין אין לבנון.

בשורות טובות.

אין ווידעא: אין אן אראבישע דערפל 'בית עומאר' נעבן חברון פאר צוויי מאנאטן צוריק.

קרעדיט: זעמל