ענווידיע פראבירט צו רעוואלוציאניזירן די פראדוקציע פון AI הארדווער דורך פארגעשריטענע ראבאטן

די 'ענווידיע' (NVIDIA) ראבאטיקס לאבאראטאריע אין סיאטל ארבעט יעצט אויף איינע פון די שווערסטע פראבלעמען אין די מעניופעקטשערינג אינדוסטריע: קענען ראבאטן איבערנעמען די האקעלע און פינקטליכע ארבעט וואס פאדערט זיך ביים בויען AI הארדווער?

אינאיינעם מיט די פירמע'ס אינזשענירן און די באקאנטע פראדוקציע פירמע 'פאקסקאן' (Foxconn), פראבירט די לאבאראטאריע צו אטאמאטיזירן צוויי גאר שווערע פראצעדורן ביים בויען די "GB300 טעסטער טרעיס", וואס ווערט גענוצט צו טעסטן די קאמפיוטער טיילן בעפאר זיי ווערן ארויסגעשיקט.

די ערשטע אויפגאבע פאדערט צו באפעסטיגן א שווערע עלעקטרישע טייל מיט 16 שרויפן, בעת די צווייטע אויפגאבע פאדערט צו כאפן פיר קליינע קעיבלס און זיי אריינשטעקן אין גאר ענגע סאקעטס. ביידע ארבעט פאדערט א געוואלדיגע פינקטליכקייט און סענסיטיוויטעט, וואס ביז היינט האבן בלויז געלערנטע ארבעטער מיט מענטשליכע הענט געקענט באווייזן צו טון.

אנשטאט זיך צו פארלאזן אינגאנצן אויף AI און מאשין-לערנען, האט די טיעם געבויט א 'הייבריד' סיסטעם וואס נוצט קלאסישע ענדזשינירינג וואו עס ארבעט דאס בעסטע, און ברענגט אריין AI בלויז וואו עס פעלט זיך עכט אויס. ביי די ערשטע אויפגאבע נוצט מען ענווידיע'ס "FoundationPose" מאדעל אינאיינעם מיט א ספעציעלע קאנטראלער, וואס האט שוין דערגרייכט א 95 פראצענט סוקסעס ראטע. פאר די קעיבלס האט מען געדארפט נוצן עפעס מער ספעציפיש, אריינגערעכנט ספעציעלע 3D געפרינטעטע כאפערס און א פראגראם וואס קאמבינירט קאמפיוטער סימולאציעס מיט עכטע פיזישע כוח-קאנטראל.

דער פראיעקט איז דערווייל נאך אין די עקספערימענטאלע פאזע, און האט נאכנישט דערגרייכט דעם ציל פון ענווידיע און פאקסקאן צו האבן א 99.5 פראצענט פארלעסליכקייט און א שנעלקייט וואס זאל קענען קאנקורירן מיט מענטשליכע ארבעטער. אבער ענווידיע זאגט אז די רעזולטאטן ווייזן א קלארע ריכטונג צו א צוקונפט פון אטאמאטיזאציע, וואס וועט שטארק רעדוצירן די געברויך פאר טייערע ארבעטער בעת די פראדוקציע פון AI הארדווער וואקסט אויף א מאסיוון פארנעם.