דער פאפולערער קאנסערוואטיווער קאמענטאטאר טאקער קארלסאן טרעפט זיך אונטער א שווערע כוואליע פון קריטיק, נאכדעם וואס ער האט אין א פרישע עפיזאד געשפעט פונעם טערמין "איסלאמישע דזשיהאד", לאכנדיג דערפון מיט די ווערטער "וואס אימער דאס מיינט". קארלסאן האט דאס געזאגט אינמיטן קריטיקירן די וועלכע האבן ארויסגעברענגט זארג איבער איסלאמישע דזשיהאד, כאמאס און חיזבאללא, אלס אן אנטשולדיגונג פארוואס זיי זענען קעגן דעם קענטאקי קאנגרעסמאן טאמעס מעסי. קליפס פונעם אינצידענט האבן זיך שנעל פארשפרייט אויף די סאציאלע נעצן, וואו קריטיקירער האבן אים באשולדיגט אין מאכן א געלעכטער פון א טערמין וואס איז פארבונדן מיט די טויטליכסטע טעראר אטאקעס אין די אמעריקאנער היסטאריע. דער קאמענטאר האט פריש אויפגעוועקט א ברייטערע קאנטראווערסיע איבער ווי אזוי קארלסאן רעדט לעצטנס ארום איסלאם, דזשיהאד און די 9/11 טעראר אטאקעס.

די קריטיק איז געקומען סיי פון קאנסערוואטיווע און סיי פון אלגעמיינע נייעס קאמענטאטארן. טייל האבן אנגעוויזן אז קארלסאן אליין פלעגט אין דער פארגאנגענהייט נוצן דעם ווארט "דזשיהאד" מיט גרויס ערנסטקייט, וואס צייגט אז זיין יעצטיגע אויפפירונג איז א דירעקטע טויש אין זיין צוגאנג און נישט סתם אז ער ווייסט נישט וואס דאס מיינט. סענאטאר טעד קרוז איז געווען צווישן די וואס האבן געשפעט פון קארלסאן'ס קאמענטארן, און פילע זשורנאליסטן האבן אים באשולדיגט אין פארמינערן א געפאר וואס ער האט אמאל גענומען גאר ערנסט.

מען האט אויך פארבינדן דעם יעצטיגן קאמענטאר מיט אנדערע קאנטראווערסיאלע סטעיטמענטס וואס קארלסאן האט לעצטנס געמאכט, אריינגערעכנט זיין טענה אז ער ווייסט נישט פון קיין איין אמעריקאנער וואס איז אומגעקומען דורך ראדיקאלע איסלאם אין די לעצטע 24 יאר - א צייט אפשניט וואס לאזט אויס די סעפטעמבער 11 אטאקעס וואס האט אומגעברענגט כמעט 3,000 מענטשן. ער האט אויך לעצטנס אראפגעמאלן די כאמאס טעראר גרופע מער ווי א פאליטישע ארגאניזאציע ווי א דזשיהאדיסטישע גרופע, א זאך וואס האט געברענגט שארפע פארדאמונגען פון פאליטישע עקספערטן און שטיצער פון מדינת ישראל.

פון די אנדערע זייט, פרובירן קארלסאן'ס שטיצער אים צו פארטיידיגן, טענה'נדיג אז ער פרובירט בלויז צוריקצושלאגן קעגן די איבערגעטריבענע נערעטיוו נאך 9/11, וואס האט אראפגעמאלן די גלאבאלע איסלאם ווי איין גרויסע סכנה, כדי צו בארעכטיגן צענדליגע יארן פון אמעריקאנער מיליטערישע אינטערווענצן אינעם מיטל מזרח. אין די לעצטע פאר יאר האט קארלסאן אסאך ארומגעפארן אין די אראבישע לענדער, גערעדט פאזיטיוו איבער געוויסע טיילן פון די איסלאמישע געזעצן, און טענה'ט אז די שרעק פאר ראדיקאלע איסלאם איז אויסגענוצט געווארן צו שאפן שטיצע פאר מלחמות וואס האבן בכלל נישט געדינט די אמעריקאנער אינטערעסן.

זיינע שטיצער זען דאס ווי א לעגיטימע פאליטישע דעבאטע איבער ווי גרויס די סכנה איז באמת. אבער קריטיקירער ענטפערן צוריק אז מאכן א געלעכטער פונעם טערמין "איסלאמישע דזשיהאד" ספעציפיש, גייט אריבער א רויטע ליניע, און אנשטאט צו קריטיקירן פאליטיק, טוט ער פארמינערן א שוידערליכע אטאקע וואס האט אומגעברענגט טויזנטער אמעריקאנער.

דער שטורעם זעט נישט אויס ווי עס גייט זיך אפשטעלן אין די נאנטע צוקונפט, ווען קאמענטאטארן פון אלע זייטן פונעם פאליטישן ספעקטרום האלטן אין איין דעבאטירן צי קארלסאן'ס רעטאריק איז אן אמת'ע אידעאלאגישע טויש, אדער עפעס אנדערש. פאר טייל מענטשן איז דאס נאך א באווייז אויף א ברייטערע טויש אין קארלסאן'ס וועלט-אויסקוק זינט ער האט פארלאזט פאקס נייעס אין 2023, וואס האט אים מער און מער דערווייטערט פון זיינע לאנגיעריגע אליאירטע אויף די רעכטע זייט. אנדערע זאגן אז ער זוכט פשוט אטענשאן און פראוואקאציע, א טאקטיק וואס ער נוצט אסאך זינט זיין אפזאג פון פאקס.

ווי אזוי מען זאל עס נאר נישט אראפלייגן, זענען די ווערטער "וואס אימער דאס מיינט" געווארן א פרישע פונקט פון קאנטראווערסיע. קריטיקירער זאגן אז עס מאכט אוועק אן אטאקע וואס טוט נאך אלס וויי פארן אמעריקאנער פאלק, בעת זיינע שטיצער טענה'ן אז די גרויסע אויפברויז אליין איז א באווייז ווי שטארק די ארגינעלע פראפאגאנדע ארום "איסלאמישע דזשיהאד" האט געארבעט.