א ספעציעלע און געהויבענע באזוך איז פארגעקומען דעם פארגאנגענעם אסרו חג סוכות, ווען הגאון רבי מאיר צבי בערגמאן שליט"א איז אנגעקומען אויף א באזוך במעון הקודש פון כ"ק אדמו"ר מגור שליט"א.

די צוויי גדולי ישראל האבן זיך פארשפארט בחדרו הפרטי פאר ארום פופצן מינוט, וואו עס איז פארגעקומען א שיינע שמועס בדברי תורה און השקפה. אינמיטן דעם שמועס האבן די רבנים געטרינקען לחיים און זיך אנגעוואונטשן ברכת קדשם.

ווי עס ווערט באריכטעט, איז א הויפט טעמע ביים שמועס געווען די יעצטיגע שווערע מצב וואס פלאגט דעם עולם התורה בארץ הקודש, בפרט איבער די גזירת הגיוס און די אנגייענדע ארעסטן פון בני ישיבות. די גדולי ישראל האבן ארומגערעדט איבער די וויכטיגקייט פון מחזק זיין די בחורים און יונגעלייט וואס זענען אפגעקומען פון די גזירה אין די יעצטיגע שווערע צייטן.

צום שלוס פונעם באזוך האט דער גערער רבי שליט"א ארויסבאגלייט דעם ראש ישיבה צום טיר, טראץ וואס הגרמ"צ בערגמאן האט זיך געבעטן ביים רבי'ן ער זאל זיך נישט מטריח זיין און אים ווייטער באגלייטן.