חברון: צה"ל אנטדעקט 15-מעטער טיפע טונעל נעבן הויז פון טעראריסט פארמישט אין טויטליכע אטאקע

דאס מדינת ישראל מיליטער זאגט אז זעלנער וועלכע פירן אדורך א מאסיווע זוכונג אין חברון האבן אנטדעקט א 15-מעטער טיפע אונטערערדישע שאכטע ממש נעבן די הויז פון איינע פון די טעראריסטן וואס זענען געשטאנען אונטער די טויטליכע אטאקע פרייטאג ביי 'צומת יהודה'. ביי יענע אטאקע זענען אומגעקומען צוויי זעלנער, ראן יונתן רויטמאן און יובל שי סווילעם, און נאך דריי זענען לייכט פארוואונדעט געווארן.

דער טונעל איז בלויז ארום 75 צענטימעטער ברייט, און איז אנטדעקט געווארן דורכאויס א ברייטע אפעראציע וואו די מיליטער האט שוין דורכגעזוכט מער ווי 500 געביידעס און לאקאציעס. אינעווייניג אין די שאכטע האבן די זעלנער געפונען אן עלעקטראנישע דעווייס, וואס איז אפגעשיקט געווארן פאר ווייטערדיגע אויספארשונגען. לויט אן ערשטראנגיגע אפשאצונג קוקט אויס אז דער טונעל האט נישט קיין ארויסגאנג.

די מיליטער האט אונטערגעשטראכן אז דער טונעל געפינט זיך טיף אינעווייניג אין די שטאט חברון, און עס זענען נישט דא קיין אידישע ישובים אין די נאענט. צו וואס פונקטליך עס איז געבויט געווארן איז דערווייל אומקלאר, און פראפעסיאנאלע עקספערטן האלטן נאך אינמיטן עס אונטערזוכן. אונטערערדישע טונעלן זענען גאר א זעלטנהייט אין די וועסט בענק, און ווערן געווענליך נאר געזען ביי כאמאס אין עזה אדער ביי חיזבאללא אין לבנון.

אינדערצייט וואס די אפעראציע גייט אן, ווערט באריכטעט אז ארום 3,000 פאלעסטינער איינוואוינער האבן געמוזט פארלאזן זייערע היימען. די ארמיי זאגט אז זיי האבן פארהאלטן ארום 50 פארדעכטיגטע פאר אויספארשונגען, און האבן קאנפיסקירט צוויי רעוואלווערס. אויספארשער פרובירן נאך אלץ צו דערגיין צי די צוויי טעראריסטן האבן געקעמפט אויף זייער אייגענע האנט אדער זענען געווען א טייל פון א ברייטערע טעראר נעצווערק, און מען האפט אז די געפונענע עלעקטראנישע דעווייס וועט קענען העלפן ענטפערן די פראגעס.