אמעריקע און ליטע שרייבן אונטער וויכטיגע אפמאך איבער קריטישע מינעראלן צו פארמינערן אפהענגיקייט פון כינע

וואשינגטאן. – סעקרעטערי אוו סטעיט מארקא רוביא און דער ליטווישער אויסערן מיניסטער קעסטוטיס בודריס האבן די וואך אונטערגעשריבן א נייעם 'מעמאראנדום אוו אנדערסטענדינג' (MOU) אפמאך. דער ציל פונעם אפמאך איז צו פארזיכערן די קריטישע מינעראלן וואס ביידע לענדער דארפן האבן צו פראדוצירן אלעס פון סמארטפאונס ביז קאמפס-עראפלאנען.

ביי די אונטערשרייבן צערעמאניע אינעם סטעיט דעפארטמענט, האט רוביא ארויסגעברענגט אז דער אפמאך שפיגלט אפ די שטארקע קאאפעראציע צווישן וואשינגטאן און ווילנע. ער האט אנגעוויזן אז ליטע וועט בקרוב איבערנעמען די פרעזידענטשאפט פונעם 'אייראפעאישן פאראיין' (EU) אין א צייט וואס עקאנאמישע זיכערהייט איז א הויפט פריאריטעט פארן ראיאן. דער אפמאך פארפליכטעט ביידע רעגירונגען צו אידענטיפיצירן וויכטיגע מינעראל פראדזשעקטן און אריינברענגען פריוואטע אינוועסטמענטס זיי צו פארווירקליכן. רוביא האט אויך באזונדער געלויבט ליטע'ס שטארקייט אין די 'פאטאניקס' אינדוסטריע אלס א ביישפיל פון די הויכע-טעכנאלאגיע וואס די נייע שותפות צילט צו באשיצן.

דער דיעל איז א טייל פון א פיל ברייטערע אמעריקאנער סטראטעגיע צו ברעכן די וועלט'ס שווערע אפהענגיקייט אויף כינע פאר'ן גראבן און פראצעסירן די רויע מאטעריאלן וואס זענען נויטיג פאר מאדערנע טעכנאלאגיע, פארטיידיגונג סיסטעמען און קלין-ענערדזשי פראדזשעקטן.

ליטע האט פארברענגט עטליכע מאנאטן צו באשליסן צי זיי זאלן מאכן א דירעקטע אפמאך מיט אמעריקע אדער ווארטן ביז די אי-יו וועט אויסארבעטן אן אלגעמיינעם אפמאך פאר אלע אירע מיטגלידער. די ליטווישע פרעמיער מיניסטער האט געוואלט ווארטן, אבער בודריס האט געדרוקט מען זאל זיך רוקן שנעלער. אלס א נאטא מיטגליד וואס געפינט זיך ביים מזרח גרעניץ פון אייראפע, צייגט ליטע'ס באשלוס זיך צו האלטן נאענט מיט וואשינגטאן א קלארע שריט צו בויען 'סופליי טשעינס' ארום פארלעסליכע שותפים אנשטאט פיינטליכע לענדער.

מיט דעם אונטערשרייבן ווערט ליטע צוגעלייגט צו א וואקסנדע ליסטע פון לענדער און פאראיינען, אריינגערעכנט די אי-יו אליינס, וואס האבן שוין געשלאסן ענליכע מינעראל אפמאכן מיט אמעריקע דעם יאר, אין ליכט פון די פארשטארקטע גלאבאלע קאנקורענץ איבער די וויכטיגע רעסורסן.