שוידערליכע אויפרייסן אין סאודי אראביע: חותי רעבעלן אטאקירן דעם אינטערנאציאנאלן עירפארט אין די הויפטשטאט ריאד

מאסיווע אויפרייסן און לופט-פייפערס האבן אויפגעטרייסלט די שטאט ריאד פרי שבת אינדערפרי, נאכדעם וואס די חותי רעבעלן האבן באטראפן א ברענשטאף סטארידזש אינפראסטרוקטור ביים 'קינג כאליד אינטערנאציאנאלע עירפארט'. דאס איז די ערשטע מאל וואס די חותי באוועגונג פון תימן האט געצילט די סאודישע הויפטשטאט זינט די קאמפן צווישן די צוויי זייטן האבן זיך צוריק אנגעצינדן אנהייב יאר.

ווידעא קליפס פון 'רויטערס' צייגן א ריזיגע געדיכטע שווארצע רויך און פלאמען וואס הייבן זיך פון אן 'אראמקא' ברענשטאף טאנק נעבן די עירפארט הייוועי און די הויפט טערמינאל. די סאודישע ציווילע פארטיידיגונג האט ארויסגעגעבן אלארמען דורכאויס די נאכט איבער לופט-געפארן פאר ריאד און די דערנעבנדיגע שטאט אל-כארדזש, בעת זיי האבן ערשט אינדערפרי געמאלדן אז די געפאר איז פאריבער.

סאודישע אויטאריטעטן האבן באשטעטיגט אז זייערע לופט-פארטיידיגונג סיסטעמען האבן אראפגעשאסן א באליסטישע מיסיל וואס איז געווען געצילט אויף די הויפטשטאט. פון זייער זייט האבן די חותי'ס געמאלדן אז זיי האבן ארויסגעשאסן א ברייטערע כוואליע פון מיסילס און דראונס געצילט אויף "סענסיטיווע ערטער" אין ריאד, ווי אויך אויף אראמקא פאסיליטיס אין די פארט שטאט יאנבו.

פלייט-טרעקינג דאטא פון 'פלייט-ראדאר-24' האט געוויזן אז דער קינג כאליד עירפארט האט דערגרייכט דעם העכסטן שטאפל פון דיסראפשענס, מיט מאסיווע פלייט דילעיס און קענסעלעישאנס. דערווייל זענען נישט באריכטעט געווארן קיין פארוואונדעטע אדער טויטפעלער פון די אטאקע אין ריאד.

א שארפע עסקאלאציע אינעם ראיאן

די יעצטיגע אטאקע קומט אינמיטן א שארפע עסקאלאציע אין די אנגעצויגנקייט וואס האט זיך אנגעהויבן אין יולי, ווען די חותי'ס האבן דערקלערט א ים-בלאקאדע קעגן סאודי אראביע און אנגעהויבן אטאקירן שיפן אינעם רויטן ים. די מצב איז נאך מער פארערגערט געווארן נאך א מאסיווע אטאקע דעם 8'טן סעפטעמבער וואס האט באטראפן ענערגיע פאסיליטיס אין פיר סאודישע שטעט אין דרום-וועסט, פארוואונדענדיג 73 מענטשן און געפירט צו ארום 50 נקמה-אטאקעס דורך די סאודיש-געפירטע קאאליציע.

די חותי'ס, וועלכע טענה'ן אז זיי ענטפערן בלויז אויף סאודישע אטאקעס אויף די תימנ'ע הויפטשטאט סאנא, קאנטראלירן יעצט דעם סטראטעגישן 'באב אל-מאנדאב' דורכגאס, וואס גיט זיי א שטארקע אויבערהאנט אנצוהאלטן זייער קאמפיין קעגן סאודי אראביע'ס הויפט אינפראסטרוקטור.

בלויז איין טאג פריער האט די יו-ען סעקיוריטי קאונסיל שארף פארדאמט די נאכאנאנדע חותי אטאקעס. די שבת'דיגע אטאקע אויף די הויפטשטאט אליינס וועט ווארשיינליך זיין א פראבע צו זען צי ריאד'ס נקמה-שריט קענען אפשרעקן פרישע אטאקעס, אדער צי די מלחמה רוקט זיך יעצט אריין אין א נייע און פיל מער געפארפולע פאזע.