דראמאטישע סצענע אויפ'ן ברוקלין בריק: פאליציי שיסט טויט א באוואפנטן מאן נאך א שעה-לאנגע שטאנד-אף

ניו יארק – א דראמאטישער אינצידענט האט זיך אפגעשפילט פרייטאג פארטאגס אויפ'ן ברוקלין בריק, ווען ניו יארק סיטי פאליציי אפיצירן האבן זיך געטראפן אין א לעבנס-געפאר שטאנד-אף מיט א מאן באוואפנט מיט א מעסער, וואס האט זיך געענדיגט מיט דעם וואס דער מאן איז דערשאסן געווארן צום טויט.

לויט די פאליציי, האט זיך די געשיכטע אנגעהויבן ארום 3:28 פארטאגס ווען עס איז אריינגעקומען א 911 רוף איבער א מאן וואס שפאצירט אויף די הויכע קעיבלס פונעם בריק. אפיצירן פון די ספעציעלע 'אי-עס-יו' (ESU) עמערדזשענסי יוניט זענען גלייך ארויסגערופן געווארן צום סצענע. אנקומענדיג האבן זיי געזען דעם מאן קריכן אויף די סטרוקטור האלטנדיג א מעסער אין די האנט.

ביי א פרעסע קאנפערענץ האבן פאליציי באאמטע איבערגעגעבן אז דער מאן האט אויסגעזען צו זיין אין א שווערן גייסטישן צושטאנד. ער האט געשריגן צו די אפיצירן אז ער וויל שטארבן, געסטראשעט אז ער האט א באמבע אויף זיך, און זיי געבעטן זיי זאלן אים שיסן. די אפיצירן, וועלכע זענען געווען צוגעבינדן מיט ספעציעלע הארנעסעס צום בריק פאר זייער אייגענע זיכערהייט, האבן פרובירט צו פארהאנדלען מיט אים פאר קרוב צו א שעה צייט, אים בעטנדיג ער זאל אראפווארפן דעם געווער און אראפקומען בשלום.

די סיטואציע האט אבער עסקאלירט ווען דער מאן האט פלוצלינג אנגעהויבן לויפן אראפ די קעיבל מיט א שנעלע ספיד דירעקט צו די אפיצירן וואס זענען געשטאנען אונטער אים. די פאליציי האבן פרובירט זיך צו רוקן אויף צוריק, אבער זענדיג אז זיי קענען זיך נישט רירן אזוי שנעל וויבאלד זיי זענען געווען צוגעבינדן צום בריק, און דער מאן איז שוין אנגעקומען קוים דריי פיס נאנט צו זיי מיט אן אויסגעשטרעקטע מעסער, האט איינער פון די אפיצירן אויסגעשאסן איין קויל.

דער מאן איז געטראפן געווארן און איז גלייך אראפגעברענגט געווארן פון די קעיבלס. מ'האט אים געגעבן ערשטע הילף אויפ'ן ארט און אים אפגעפירט צום בעלוויו שפיטאל, וואו דאקטוירים האבן באשטעטיגט זיין טויט. די מעסער איז געטראפן געווארן אויפ'ן סצענע און די גאנצע אינצידענט איז רעקארדירט געווארן אויף די באדי-קעמס פון די פאליציי.

קיין אנדערע אפיצירן אדער ציווילע זענען נישט פארוואונדעט געווארן אינעם אינצידענט. די שיסעריי האט געפירט דערצו אז די לעינס אויפ'ן בריק אריין קיין ברוקלין זענען געווארן אפגעשפארט פאר עטלעכע שעה, וואס האט אנגעמאכט שווערע טראפיק פאר די אינדערפרי קאמיוטערס. שפעטער אינדערפרי זענען די לעינס צוריק געעפנט געווארן.

די פאליציי 'פארס אינוועסטיגעישאן דיוויזשען' פארשט אויס דעם אינצידענט, ווי ס'איז דער סטאנדארט פראצעדור ביי יעדע פאל וואס אן אפיציר נוצט טויטליכע קראפט. דאס איז שוין די צווייטע מאל אין בלויז עטלעכע טעג וואס די ניו יארקע פאליציי שיסט טויט א מענטש באוואפנט מיט א מעסער, נאך אן ענליכע קאנפראנטאציע וואס האט זיך אפגעשפילט אין טיימס סקווער אנהייב וואך.