אנטווערפן - א מעשה נורא האט פאסירט די טעג אין אנטווערפן ווען א איד האט ל"ע מיט צוויי חדשים צוריק פלוצלינג פארלוירן די ראי' אויף איין אויג, דאקטוירים און פראפעסארן האבן נישט געקענט דערגיין דער אורזאך פונעם פלוצימדיגער ערשיינונג, אבער איין זאך איז קלאר אז דער ראי' אין יענעם אויג איז ל"ע פערטיג. בלית ברירה האבן די דאקטוירים באשלאסן צו אפערירן אונטערן אויג כדי אויסצורייניגן אנגעזאמלטע בלוט וועלכע האט פארשטעלט דאס אריינקוקן טיפער אין אויג אריין, און אולי נאכדעם וועט מען קענען דערגיין וואס דא טוט זיך.

שבעה עשר בתמוז האט איינער אנגעטראגן פאר דעם איד, ער זאל בודק זיין זיינע מזוזות, ווייל כידוע ווערט געברענגט בשם צדיקים אז בעידן חולי או צרה רח"ל זאל מען צום ערשט בודק זיין די מזוזות. צומארגנס ערב שבת קודש האט ער טאקע אריינגעטראגן די מזוזות צום סופר הר"ר יהושע ליפשיץ. גייט נישט דורך קיין לאנגע צייט און דער סופר קומט צוריק און ער צייגט אים ווי אויף איין מזוזה ביים ווארט בין 'עיניכם' פעלט אן אות 'י' און שטייט בלויז 'עינכם'. איבעריג צו זאגן אז אויף שבת קודש איז דארט געווען א נייע מזוזה. ויהי ערב ויהי בוקר, שבת אינדערפרי איז דער איד אויפגעשטאנען און געזען אויף ביידע אויגן! אין שול האט ער דערציילט די מעשה פארן עולם און ותהום כל העיר! דינסטאג איז ער געפארן צום גרויסן פראפעסאר זיך אונטערזיכן איידער די אפעראציע, אבער ווען דער דאקטאר האט באטראכט די טעסטס איז ער ארויס פון די כלים זאגענדיג דאס איז נישט צום גלייבן און ער האט אין לעבן אזוינס נישט געזען, אויף די נייע טעסטס זעט ער נישט קיין שום צייכן פון קיין פראבלעם!

דער מעשה איז יעצט פארעפענטליכט געווארן דורך הגה"צ אב"ד שפיקוב שליט"א פון אנטווערפן, ביי וועם דער איד דאווענט און האט געגעבן רשות מפרסם צו זיין די מעשה - להגדיל שם השם