בס"ד

שוידערליכע טראגעדיע אין קאליפארניע: א נייעס העליקאפטער קראכט אינמיטן דעקן א טויטליכן עקסידענט, איבערלאזנדיג 3 טויטע

א שרעקליכע סצענע האט זיך אפגעשפילט אין טשעטסוואורט, קאליפארניע, דעם 15'טן סעפטעמבער אין די אוונט שטונדן, ווען א נייעס העליקאפטער פון די 'ען-בי-סי 4' און 'טעלעמונדא 52' סטאנציעס האט פארלוירן קאנטראל און אראפגעקראכט. דער העליקאפטער איז פונקט דעמאלטס געווען אינמיטן טראנסמיטירן לעבעדיגע בילדער פון די לופטן איבער א טויטליכן עקסידענט צווישן א מעטרא באס און אן עס-יו-ווי (SUV) וואס איז פארגעקומען אונטן אויף די גאס.

דער העליקאפטער, א 'יוראקאפטער AS350' אפערירט דורך די פירמע 'ענדזשעל סיטי עיר', האט אראפגעקראכט אין א פארקינג לאט צווישן צוויי קאמערציאלע געביידעס און איז אויפגעריסן אין פלאמען אויפ'ן ארט. אין דעם קראך זענען אומגעקומען דער וועטעראן פילאט דזשארדזש מארסיניו און די נייעס פאטאגראפירער עליאנא מארענא, וועלכע זענען שוין יארן לאנג געפלויגן אינאיינעם צו דעקן גרויסע נייעסן איבער סאוטערן קאליפארניע. א דריטער פערזאן וואס איז געשטאנען אונטן אויף דער ערד בעת'ן קראך איז אויך אומגעקומען, און א פערטער איז אפגעפירט געווארן אין שפיטאל. באאמטע געבן איבער אז מיט דעם קראך איז די צאל טויטע פון יענעם טאג געשטיגן צו פינעף, אריינרעכענדיג די צוויי מענטשן וואס זענען אומגעקומען אינעם ארגינעלן באס עקסידענט וואס דער העליקאפטער איז געקומען דעקן.

די 'נעשאנאל טראנספארטעישאן סעיפטי בארד' (NTSB) פירט איצט אן די אויספארשונג צו דערגיין וואס האט געפירט צום קראך, און א ספעציעלע טיעם ווערט ערווארטעט אנצוקומען אויפ'ן סצענע צו אונטערזוכן די ברוכווארג. לויט אן אנאליז פון 'סי-ען-ען' אויף די ווידעא רעקארדירונגען פון אינעווייניג אינעם העליקאפטער אין די לעצטע מאמענטן, קען מען הערן ווי דער מאטאר פארלירט קראפט, אינאיינעם מיט אן אלארם וואס ווארנט אז די הויפט פראפעלערס פאנגען אן צו פארלירן שנעלקייט. אפיציעלע באאמטע האבן אבער נאכנישט באשטעטיגט די אפיציעלע אורזאך.

דער לאס אנדזשעלעס מעיאר, קארען בעס, האט עס אנגערופן א "הארצרייסנדע נאכט פאר די שטאט". די נייעס סטאנציעס האבן ארויסגעגעבן א סטעיטמענט קלאגנדיג אויפן פארלוסט פון זייערע צוויי קאלעגן וועלכע האבן פארברענגט הונדערטער שעה'ן פליענדיג אינאיינעם, אריינגערעכנט ביי די ווילדע וואלד פייערן אין יאנואר 2025. די טראגעדיע האט איבערגעלאזט די ארטיגע קאמיוניטי און די לאקאלע נייעס אגענטורן אין שאק, נאכדעם וואס צוויי טויטליכע קראכן האבן פאסירט אין איין איינציגן אוונט.