טויזנטער אידן קומען זיך צונויף אין פרעסבורג צום 187'סטן יארצייט פונעם חתם סופר זי"ע, באגלייט מיט א היסטארישע הכנסת ספר תורה
גאלערי
בס"ד
היסטארישע הכנסת ספר תורה און סיום הש"ס ביים גרויסארטיגן יומא דהילולא פונעם חתם סופר זי"ע אין פרעשבורג
טויזנטער אידן פון איבער דער גארער וועלט האבן זיך פארזאמלט אין שטאט פרעשבורג (בראטיסלאווא, סלאוואקיי) אפצוגעבן כבוד און מתפלל זיין ביים ציון פונעם הייליגן חתם סופר זי"ע, צום 187'סטן יארצייט וואס איז געפאלן כ"ה תשרי. דער הויכפונקט פונעם היי-יעריגן יומא דהילולא איז געווען א גרויסארטיגע און היסטארישע מעמד הכנסת ספר תורה.
צווישן די פילע רייזנדע האבן זיך אנגעזען צענדליגע רבנים און אייניקלעך פונעם בעל ההילולא, ווי אויך פילע תלמידים און אידן וואס זענען געקומען שואב זיין ישועות ביים ציון הקדוש. די יערליכע נסיעה און הילולא איז ארגאניזירט געווארן דורך דעם 'חתם סופר צענטער', וועלכע אפערירט אונטער די פירערשאפט פון קהל פרעשבורג לאנדאן. די עסקנים האבן זיך געזארגט פאר אלע געברויכן פון די פילע געסט, אריינגערעכנט עסן, שלאפן, און שטרענגע זיכערהייט. דורכאויס דעם טאג זענען פארגעקומען כסדר'דיגע מנינים אין דעם צענטער וואס געפינט זיך הארט נעבן דעם בית החיים.
ספעציעל לכבוד דעם היי-יעריגן יארצייט, איז געעפנט געווארן א נייע פראכטפולע מקוה אינעם צענטער, צוצושטעלן נאך א וויכטיגע באקוועמליכקייט פאר די פילע מתפללים וואס קומען פוקד זיין דעם ציון.
ווי דערמאנט, איז דער קלימאקס פונעם מעמד געווען די היסטארישע הכנסת ספר תורה וואס איז געשריבן געווארן לעילוי נשמת דעם חתם סופר זי"ע, דורך אן אנאנימער נדבן וואס האט זיך אונטערגענומען צו פארשפרייטן זיין תורה. דער נייער ספר תורה איז געברענגט געווארן פון ירושלים קיין פרעשבורג אויף א ספעציעלע טשארטער פליגער.
הונדערטער בני תורה, אברכים און רבנים האבן זיך באטייליגט אין די פייערליכע פראצעסיע, ווי מען האט געטאנצן מיט גרויס התלהבות לכבודה של תורה אויפן פראמענאד ביים ברעג פונעם דוניי טייך, ביז מען האט אריינגעבאגלייט דעם ספר תורה אינעם בית המדרש פונעם חתם סופר צענטער.
שפעטער זענען די טויזנטער באטייליגטע זיך צוזאמגעקומען צו א גרויסארטיגע סעודת הילולא אינאיינעם מיט א סיום הש"ס, אפצוגעבן כבוד פאר די תורה און מורשה פונעם הייליגן חתם סופר. דער געהויבענער מעמד האט פאראייניגט אידן פון אלע שיכטן און קרייזן פון איבער דער גארער וועלט, וועלכע זענען זיך צוזאמגעקומען מיט איין ציל: צו פייערן און ממשיך זיין דעם קשר צום גרויסן בעל ההילולא און זיין תורה.