בארא פארק: העפטיגע צוגרייטונגען פאר א ריזיגע 'חול המועד סוכות' פראגראם אויף 18'טע עוועניו

בארא פארק — העפטיגע צוגרייטונגען זענען אין פולן שוואונג פאר א מאסיווע און פרייע חול המועד סוכות פראגראם וואס וועט ברענגען ריידס, אונטערהאלטונג און אקטיוויטעטן פאר די גאנצע משפחה אויף 18'טע עוועניו אין בארא פארק.

די ארגאניזירער פונעם 'בארא פארק דזשעי-סי-סי' (BPJCC) זענען זיך צוזאמגעקומען מיט אפיצירן פונעם 66'סטן פאליציי פריסינקט און מיטגלידער פון בארא פארק שומרים פאר א ספעציעלע זיכערהייט טור אויפ'ן פלאץ, צו מאכן זיכער אז אלעס גייט צו מיט די העכסטע מאס זיכערהייט פאר דעם גרויסן קאמיוניטי איווענט.

די גרויסארטיגע פראגראם איז געפלאנט אויף דאנערשטאג, דעם 1'טן אקטאבער, דער פערטער טאג חול המועד סוכות, פון 12:00 מיטאג ביז 5:00 נאכמיטאג.

לויט די BPJCC וועט די פראגראם אנטהאלטן ריידס, לעבעדיגע מוזיק, קאנצערטן, שאוס, קארניוואל אטראקציעס, א פעטינג זו, מתנות און נאך פילע אינטערעסאנטע אקטיוויטעטן - אלעס אינגאנצן פריי פון אפצאל פאר די משפחות. ווי אויך איז געפלאנט א ריזיגע סוכה אויפ'ן פלאץ לרווחת הציבור.

די סוכות איווענט קומט נאך די געוואלדיגע סוקסעס פון די פאפולערע חול המועד פסח פראגראמען דורך די BPJCC, וואס האט צוגעצויגן טויזנטער לאקאלע קינדער און משפחות. די ארגאניזירער געבן איבער אז דאס איז די ערשטע מאל אין אסאך יארן וואס אזא גרויסע פראגראם ווערט אויסגעברייטערט אויך אויף חול המועד סוכות.

די פראגראם ווערט ספאנסערד מיט פאנדן וואס זענען באשטעטיגט געווארן דורך סטעיט סענאטאר סעם סאטאן, אין א שותפות מיט אסעמבלימאן שמחה אייכנשטיין.

מער דעטאלן איבער דעם איווענט וועלן מעלדן ווערן אין די קומענדיגע טעג ווי די צוגרייטונגען גייען אן אין פולן קראפט.