וכבוד גדול עשו לו במותו =

אין בית המדרש הגדול ד'סאטמאר אין בארא פארק איז נעכטן דינסטאג אויפדערנאכט פארגעקומען א גרויסארטיגע עצרת הספד ככלות השבעה פון כ"ק מרן שרגא פייוויש האגער האדמו"ר מקאסוב זכר צדיק לברכה,

די מעמד איז פארגעקומען אינעם היכל הביהמ"ד וועלכע איז געווען אויסגעשטעלט מיט צענדליגער רייעס זיץ פלעצער צו קענען אקאמאדירן דעם ריזן ציבור אנשי שלומינו תושבי עיר בארא פארק וועלכע זענען געקומען זיך משתתף זיין ביים גרויסארטיגן מעמד צו טרויערן אויף די  גרויסע אבידה מיט'ן פטירה פון האדמו"ר מקאסוב זצ"ל נאכ'ן שפירן גאר א נאנטע קשר מיטן רבי'ן וואס פלעגט דא פראווען זיין געהויבענע עבודה בימות החול,

אויפ'ן אויבנאן האבן זיך אנגעזעהן פילע רבני ודייני קהילתינו הק' און אזוי אויך בניו האחים האדמורי"ם מקאסוב שליט"א וחתני האדמו"ר מקאסוב זצ"ל.

אום 9:15 איז שוין די ביהמ"ד געווען פול מן הקצה אל הקצה מלא על כל גדותיו און מ'האט תיכף צוגעטרעטן צום מעמד,

צום ערשט האט אויפגעטרעטן הרה"ג ר' נפתלי הירצקא קליין שליט"א יושב ראש התאחדות אברכים דקהילתינו הק' וואו ער האט ארויסגעברענגט די שייכות וואס קאסוב'ער רבי האט געהאט מיט דעם ביהמ"ד, ער האט ארומגערעדט איבער זיין עבודה וואס ער פלעגט דא פראווענען אין דעם ביהמ"ד, די שעות ארוכות וואס ער האט אריינגעלייגט אין עבודת התפילה וואס איז געווען א כבוד אין א זכי' פאר אונזער קהילה אז ער האט אויסגעוועלט צו דאווענען דווקא אין אונזער ביהמ"ד, די לימוד התורה אין וואס ער פלעגט עוסק זיין, די ישועות וואס ער פלעגט פועל'ן פאר אידישע קינדער, וויפיל אידן ער האט מחזק געווען און ארויפגעשטעלט אויפ'ן דרך הישר, און אונזער ביהמ"ד האט זוכה געווען צו זיין א גאסטגעבער צו די אלע הייליגע פעולות וואס ער האט געטוהן דא אין אונזער ביהמ"ד,

ער האט ארויסגעברענגט וויפיל דער קאסוב'ער רבי האט אויפגעטוהן אינעם ביהמ"ד דורכאויס אלע יארן, און ארויסגעברענגט בשם אלע מתפללי הביהמ"ד די הכרת הטוב געפילן פאר האדמו"ר מקאסוב זצ"ל וועלכע האט אלע יארן אזויפיל צוגעגעבן צום ביהמ"ד און ארויפגעברענגט דעם סטאנדארט אין פילע הינזיכטן.

דערנאך האט הגה"צ גאב"ד דקהילתינו הק' שליט"א אויפגעטרעטן מיט א דרשה,

דער רב האט צום ערשט געזאגט אז וויבאלד ס'איז א סאטמאר'ע ביהמ"ד דארף מען זאגן דברי הספד אויף הגה"צ ר' שמעי' גרינבוים זצ"ל מח"ס סייעתא דשמיא, דער רב האט צווישן אנדערע ארויסגעברענגט די פלא'דיגע ארבעט פון די משניות מיט'ן פירוש סייעתא דשמיא וואס ער האט געמאכט, און בכלל וויאזוי זיין לעבן איז געווען אוועקגעשטעלט נאר אויף תורה.

דער רב האט ארומגערעדט איבער די גרויסקייט פון קאסוב'ע רבי, און צווישן אנדערע ארויסגעברענגט אז אויבן אין הימל האט מען געדארפט האבן א צדיק וואס פארשטייט צו דעם דור, ממילא האט מען ארויפגענומען דעם קאסוב'ער רבי'ן זצ"ל כאטש זיין יונגע יארגאנג,

דער רב האט אויך ארויסגעברענגט ווי מ'האט געזעהן כסדר אין ביהמ"ד אז אפי' א פגר האט געקענט צוקומען צו אים און ער האט זיך אראפגעלאזט מן ההר אל העם צו יעדן פשוט'ן איד.

דערנאך האט ר' נפתלי הירצקא אויפגערופן דעם קאסוב'ער רבי'ס איידעם הרה"ג ר' ישכר רובין שליט"א אויפצוטרעטן מיט א דרשה,

ר' ישכר האט זיך באדאנקט פאר די קהילה אז מ'האט אזוי שיין אויפגענומען זיין שווער, און אז מ'האט אים געמאכט אייביג פילן באקוועם, און ווי מ'זעהט טאקע אז ער האט אויסגעוועלט דווקא דעם ביהמ"ד, וויבאלד דא האט מען אים נישט געשטערט און גאר שטארק מכבד געווען,

דערנאך האט ער ארומגערעדט איבער די גדלות פון זיין גרויסן שווער, ער האט ארויסגעברענגט אז זיין שווער איז געווען אן אמת'ע עבד השם און ער האט קיינמאל נישט געמיינט זיך, נאר די טובה פון אנדערע, ער האט זיך אליינס בכלל נישט גורס געווען,

ער האט דערביי פארציילט אז ער פלעגט אסאך מאל נישט גיין צום טיש פון זיין שווער פרייטאג צו נאכטס, און זיין שווער פלעגט אים נישט זאגן קיין ווארט, ווייל ער האט נאר געפירט טיש ווייל ס'איז אן ענין אז אידן קומען זיך צוזאם פרייטאג צו נאכטס, ס'איז בכלל נישט געווען פאר זיין כבוד,

ער האט אויך ארומגערעדט איבער די גרויסע אבידה וואס ס'איז אז ער איז ליידער נסתלק געווארן לגנזי מרומים, און ארויסגעברענגט אז מ'זאל זיך פארשטעלן אז דער קאסוב'ער רבי לעבט פאר נאך אסאך יארן וואס ס'וואלט ווען געווען אויפ'ן וועלט, איבער א גאנצע דור וואלט נאך געקענט זיין אונטער זיין השפעה, און וועגן דעם דארפן מיר קלאגן.

דערנאך האט אויפגעטרעטן מיט די צענטראלע דרשת הספד הגה"צ ר' יוסף בנימין וואזנער שליט"א אדמו"ר משבט הלוי וגאב"ד זכרון מאיר - שוואגער מיט האדמו"ר מקאסוב זצ"ל וואו ער האט אראפגעלייגט די עבודת הקודש פון זיין חשוב'ן שוואגער האדמו"ר מקאסוב זצ"ל, ער האט פארציילט עטליכע עובדות וסיפורים וואס האט גאר שטארק איבערגענומען דעם גאנצן ציבור וואס האט איינגעזעהן אז וויפיל מען האט געקענט דעם דמות פונעם נפטר איז די אבידה אסאך גרעסער ווי מען האט זיך פארגעשטעלט,

ער האט ארויסגעברענגט אז דער קאסוב'ער רבי איז געווען אן איש פלא, דריי פאכיג, סיי אין תורה און סיי אין מידות טובות, און סיי בכלליות,

דערנאך האט ער מעורר געווען דעם ציבור אנשי שלומינו אז אפי' ס'איז סאטמאר'ע קהילה און מ'האט א רבי וואס שטייט על המשמר, דארף מען נאכאלץ וויסן אז די היינטיגע צייטן זענען נישט אזויווי אמאל, די וועלט איז מורא'דיג אסאך געפאלן אין עניני צניעות, טעכנאלאגיע, און אין דאווענען, און מ'דארף זעהן זיך צו האלטן שטארק,

ער האט צוגעענדיגט אז די דריי צדיקים וואס זענען נפטר געווארן די לעצטע דריי וואכן זענען א בית דין, און אלץ בית דין האבן זיי א כח מעורר רחמים צו זיין פאר אונז אויבן אין הימל.

דערנאך האט אויפגעטרעטן הרה"ג בנציון כ"ץ שליט"א אב"ד דזשיבוי בארא פארק וואו ער האט ארומגערעדט איבער די פערזענליכע שייכות וואס קאסוב'ער רבי האט געהאט מיט'ן ביהמ"ד, ער האט צווישן אנדערע ארומגערעדט איבער זיין עבודת התפילה וואס האט מיטגעשלעפט דעם גאנצן עולם.

אנשי שלומינו תושבי עיר בארא פארק זענען אהיים נאך אזא מעמד אין אן ערנסטן שטימונג נאכ'ן זיך פארנעמען קבלת טובות שפירנדיג אזא נאנטע קשר מיט'ן גרויסן נפטר, און מיט דערהויבענע געפילן אנערקענענדיג די גרויסע זכי' וואס מ'האט געהאט צו קענען האבן אזא איד ביי אונז אין ביהמ"ד יעדן איינציגן טאג בימי החול. אשרינו שזכינו!

= וכל בית ישראל יבכו את השריפה אשר שרף ה' =