היסטארישע שריט אין אוויאציע: כינע'ס 'קאמאק' פירמע פירט דורך ערשטע סוקסעספולע פלי מיט מענטשן אויף נייעם עלעקטרישן פליגער

די כינעזע עראספעיס פירמע 'קאמאק' (COMAC) האט מיט סוקסעס דורכגעפירט די ערשטע פלי מיט א מאנשאפט אויף איר נייעם CE-25A עלעקטרישן פליגער. דאס איז א גרויסע שריט פאראויס פאר דעם 19-זיצן פליגער וואס איז געצילט פאר קורצע רייזעס צווישן שטעט.

די היסטארישע פלי איז פארגעקומען שבת, נאוועמבער 14, אין די שטאט בינזשאו, אין די שאנדאנג פראווינץ אין מזרח כינע. אויפן פליגער זענען געווען צוויי פילאטן און א פלי-טעסט אינזשעניר. דער פליגער איז געבליבן אין די לופטן פאר 16 מינוט און 38 סעקונדעס, און האט באדעקט א שטרעקע פון 60.4 קילאמעטער. די כינעזע סטעיט טעלעוויזיע נעצווערק CCTV האט איבערגעגעבן אז אלע פערפארמענס אינדיקאטארן האבן דערגרייכט די ערווארטונגען. דאס איז דער ערשטער עלעקטרישער קאמערציאלער פליגער וואס ווערט אנטוויקלט דורך קאמאק, די זעלבע פירמע וואס בויט דעם באקאנטן C919 דזשעט.

דער CE-25A איז אן אינגאנצן עלעקטרישער פליגער וואס פארמאגט צען עלעקטרישע פענס, מיט א מאקסימום אויפהויב-וואג פון ארום 10 טאן. עס איז דיזיינט צו פליען מיט א 'קרוזינג ספיד' פון ארום 300 קילאמעטער א שעה, און האט א רעינדזש פון ארום 400 קילאמעטער, וואס מאכט עס פאסיג פאר לאקאלע קאמיוטער רוטס צווישן נאענטע שטעט.

בעפאר מענטשן זענען ארויפגעגאנגען דערויף, האט דער פליגער שוין דורכגעמאכט זיין ערשטע פלי אן קיין פאסאזשירן דעם 2'טן פעברואר, און דערנאך נאך 19 אטאנאמישע טעסט פליען אן קיין מענטשן.

דערווייל האט דער פליגער נאכנישט געטראגן קיין פאסאזשירן, און דער סערטיפיקאציע פראצעס גייט נאך אן אין פולן שוואונג. טראץ דעם סוקסעס, בלייבן נאך אלץ איבער גרויסע פראגעס ארום די בעטערי לימיטס, טשארדזשינג, און צי עס וועט למעשה קענען ווערן א סערטיפיצירטע אלטערנאטיוו צו די טראדיציאנאלע לאקאלע פראפעלער פליגערס.