שווערע רעגנס האבן אנגעהויבן פאלן אין מאנסי און אין די ארומיגע ראקלאנד קאונטי געגנטער דאנערשטאג נאכמיטאג, אין די צייט וואס וועטער פאראויסזאגער האבן געווארנט איבער מעגליכע שווערע טאנדערסטארמס און לאקאלע פארפלייצונגען איבער די ראיאן.

די 'נעשאנאל וועטער סערוויס' האט ארויסגעלייגט א 'פלאד וואטש' פאר מאנסי און די אומגעגנט וואס וועט זיין אין קראפט ביז 11 אזייגער ביינאכט (דאנערשטאג, אוגוסט 27), ווי אויך א 'סיוויר טאנדערסטארם וואטש' ביז 8 אזייגער אין אוונט.

די פלאד וואטש דעקט גאנץ ראקלאנד קאונטי, מיט פאראויסזאגונגען פאר ארום 1 ביז 1.5 אינטשעס רעגן, און אין געוויסע לאקאלע ערטער קען עס מעגליך דערגרייכן ביז 3 אינטשעס. ביי די שטערקסטע גאס-רעגנס קען פאלן ארום 1.5 ביז 2.5 אינטשעס א שעה, וואס ברענגט אן ערנסטע געפאר פון שנעלע פארפלייצונגען (פלעש פלאדינג) אין נידעריגע ערטער און גאסן וואס האבן א שוואכע דרעינאדזש סיסטעם.

די וועטער פאראויסזאגונג פאר מאנסי צייגט א 90 פראצענט שאנס פאר רעגן און שטורעמעס דאנערשטאג נאכמיטאג און אריין אין די אוונט שטונדן, מיט א מעגליכקייט אז טייל פון די שטורעמעס זאלן זיין גאר שווער.

אין ליכט פון די שטורעמעס, האט די לאקאלע עלעקטריק פירמע 'אראנדזש ענד ראקלאנד' (O&R) מאביליזירט זייער עמערדזשענסי שטאב, אריינגערעכנט ארבייטער צו פאררעכטן עלעקטריק ליין'ס און אראפנעמען געפאלענע ביימער, וועלכע זענען געשטעלט געווארן אויף סטענדביי. די קאמפאני האט געווארנט אז די שטארקע ווינטן, בליצן און די אנגעזאפטע ערד קענען אראפווארפן ביימער און עלעקטריק ווייערס, וואס קען מעגליך פירן צו לאקאלע פאוער אוטעדזשעס.

איינוואוינער ווערן געבעטן צו זיין אלארמירט און פארזיכטיג בעת די שטורעמעס רוקן זיך דורך די געגנט, און זיך דערווייטערן פון פארפלייצטע גאסן.