בס"ד

אינטערעסאנטע סטאטיסטיק: כמעט איינס פון יעדע צוועלף אידן אין ארץ ישראל האבן שוין באזוכט דעם ציון פון ר' נחמן אין אומאן

ארץ ישראל. — א נייע שטודיע וואס איז ארויסגעשטעלט געווארן צייגט אן אינטערעסאנטע בילד איבער די פאפולאריטעט פון פארן קיין אומאן צווישן די איינוואוינער אין ארץ ישראל. לויט די דאטא, האט 8 פראצענט פון די אידישע באפעלקערונג אין לאנד - וואס איז בערך איינס פון יעדע צוועלף דערוואקסענע אידן - שוין באזוכט דעם ציון פון הרה"ק ר' נחמן מברסלב זי"ע אין אומאן אמווייניגסטנס איין מאל אין זייער לעבן.

די אנקעטע, דורכגעפירט דורך די 'איזראעל דעמאקראסי אינסטיטוט' אין די חדשים פון יולי און אויגוסט, האט אויסגעפרעגט אן אויסוואל פון 1,002 דערוואקסענע אידן איבער די עלטער פון 18 יאר.

די רעזולטאטן צייגן אז די נסיעות קיין אומאן זענען ווייט נישט באגרעניצט נאר צו ברסלב'ע חסידים אדער צום חרדי'שן ציבור. פון די אלע וואס האבן שוין באזוכט דעם ציון, האבן זיך 42% אידענטיפיצירט אלס טראדיציאנאל (מסורתי), 26% אלס חרדים, 21% אלס פרייע, און 11% אלס רעליגיעז-נאציאנאל (דתי לאומי).

קוקנדיג אויף יעדע גרופע באזונדער, קומט אויס אז 19% פונעם חרדי'שן ציבור אין ארץ ישראל זענען שוין געווען אין אומאן, אין פארגלייך צו 16% פונעם טראדיציאנאלן ציבור, 7% פון די דתי לאומי, און 4% פון די פרייע.

אן אינטערעסאנטע פונקט וואס די שטודיע ברענגט ארויס איז די שטארקע פארבינדונג ביי די ספרדי'שע קרייזן. 13% פון ספרדי'שע אידן האבן באריכטעט אז זיי זענען שוין געווען אין אומאן, קעגן בלויז 5% ביי די אשכנזי'שע אידן און 4% ביי די וואס קומען פון א געמישטע אפשטאם.

נאך א מערקווירדיגע געפינס איז, אז רוב באזוכער פון ארץ ישראל פארן נישט ספעציעל אויף ראש השנה. ארום 59% פון די וואס זענען שוין געווען אין אומאן האבן געזאגט אז זיי זענען קיינמאל נישט דארט געווען אויף יום טוב ראש השנה, בשעת 41% זענען שוין יא געווען אמווייניגסטנס איין מאל אויף ראש השנה.

די נסיעה קיין אומאן איז אויך זייער אן איינגעריסענע זאך ביי די וואס פארן כסדר. פון די וואס זענען שוין געווען, זאגן 49% אז זיי פארן צוריק איינמאל אין עטליכע יאר, און נאך 22.5% פארן אמווייניגסטנס איין מאל א יאר.

ווי אויך צייגט די דאטא אז דער אינגערער דור פארט מער: 10% פון די צווישן 18 און 44 יאר אלט זענען שוין געווען אין אומאן, אין פארגלייך צו 6% ביי די וואס זענען 45 יאר און עלטער. אזוי אויך איז די פראצענט העכער ביי מענטשן מיט א שוואכערע איינקונפט ווי ביי די וואס פארדינען מער.

די סטאטיסטיק ווערט פארעפנטליכט אין די צייט וואס צענדליגע טויזנטער אידן פון איבער דער גאנצער וועלט קלייבן זיך צוזאם אין אומאן צום יערליכן "קיבוץ" אויף ראש השנה. דער אינסטיטוט צייגט אן אז די שאצונגען שטעלן דעם יערליכן ראש השנה ציבור אויף ארום 50,000 באזוכער.