מדנ"י מיליטער פירט דורך אומגעמאלדענע מאסיווע איבונגען איבער'ן גאנצן לאנד זיך צוצוגרייטן פאר א פיל-פראנטיגע קריג

די מדינת ישראל מיליטער האט זונטאג פארטאגס אנגעהויבן אן אומגעמאלדענע, מאסיווע מיליטערישע דריל איבער'ן גאנצן לאנד, צו טעסטן די גרייטקייט פונעם מיליטער צו רעאגירן צו א פלוצלינגדיגע און קאמפליצירטע קריג וואס קען אויסברעכן אויף עטליכע פראנטן אויף איין מאל.

די סורפרייז דריל, וואס איז פארארדנט געווארן דורך דער טשיף אוו סטעף לוטענאנט גענעראל איל זמיר, האט באקומען דעם נאמען "ברעיקינג דאון 2.0". עס האט געטעסט די גרייטקייט פון די הויפט קאמאנד צענטערן, דאס מאביליזירן די רעזערוויסטן און סטעינדביי קרעפטן, און די באשלוסן-מאכן פראצעס דורכאויס די גאנצע קייט פון קאמאנדירן. קאמאנדירן פון אלע ראיאנען און אפטיילונגען זענען אריינגערופן געווארן אן קיין פריערדיגע ווארענונג אלס א טייל פונעם טעסט. די פובליק איז געווארנט געווארן צו ערווארטן א פארמערטע באוועגונג פון זיכערהייט קרעפטן און מיליטערישע פליגערס איבער'ן לאנד, כאטש די באאמטע האבן קלארגעשטעלט אז עס איז נישט דא קיין שום קאנקרעטע זיכערהייט דראונג וואס האט געפירט צו די איבונגען.

ביי א ספעציעלע זיכערהייט אפשאצונג וואס איז אפגעהאלטן געווארן אינמיטן די דריל, האט זמיר אראפגעלייגט דעם יעצטיגן מצב מיט שארפע ווערטער. "מיר געפינען זיך אין אנגעצויגענע און אומסטאבילע צייטן אויף אלע פראנטן, און מיר גרייטן זיך פאר די קומענדיגע יום טוב סעזאן," האט ער געזאגט, אנווייזנדיג אויף דעם קומענדיגן ראש השנה וואס פאלט אויס סעפטעמבער 12.

ער האט אונטערגעשטראכן אז די לעקציעס פון די אקטאבער 7 אטאקעס בלייבן דער הויפט פאקוס פונעם מיליטער אויף ווייטער. "מיר האלטן אין איין ארויסנעמען לעקציעס, און ווי איך האב עס אוועקגעשטעלט, איז די גרונטליכע פאזיציע פונעם גאנצן מיליטער צו זיין גרייט פאר א סורפרייז אטאקע." זמיר האט מסביר געווען אז די דריל איז ספעציעל אויסגעשטעלט געווארן נאכצומאכן א מלחמה אויף עטליכע פראנטן, וואס גיט די מעגליכקייט פאר די קאמאנדירן צו טעסטן די גרייטקייט אויף אלע שטאפלען, אנגעהויבן פונעם גענעראל שטאב ביז די קלענסטע פעלד איינהייטן.

די איבונגען האבן אריינגענומען סצענארן פון א פלוצלינגדיגע אטאקע און אינפילטראציע אין מדינת ישראל טעריטאריע דורך די לופט, ים, און יבשה, ווי אויך דאס באשיצן די גרעניץ שטעט, אריינגערעכנט די שטאט אילת. די טרופן האבן געדרילט אפעראציאנאלע קאארדינאציע נישט נאר אינערהאלב דעם מיליטער, נאר אויך מיט די פאליציי, מגן דוד אדום, און אנדערע ערשטע הילף אגענטורן. דאס קומט אלס א רעזולטאט פון די לעקציעס פון אקטאבער 7, וואס האט ארויסגעוויזן די וויכטיגקייט פון א נאנטע קאארדינאציע צווישן ציווילע און מיליטערישע אגענטורן.

זמיר האט פערזענליך איבערגעקוקט טיילן פון די דריל פונעם הויפט קאמאנד צענטער און אויך פון די פעלד, באזוכנדיג די טרענירונג צענטער צוזאמען מיט הויכראנגיקע קאמאנדירן, אריינגערעכנט דער הויפט פון די אפעראציעס דירעקטאראט און די קאמאנדירן פון די סאוטערן קאמאנד און די עזה דיוויזיע. ער האט באזונדער געווארנט אז סיי וועלכע פיינטליכע אטאקע וועט באגעגנט ווערן מיט אן אומגעוויינליך שווערן פרייז.

די טיימינג פון די איבונגען טראגט א באזונדערע באדייט, קומענדיג קורץ פאר די דריטע יארטאג פון די אקטאבער 7 אטאקעס, און אינמיטן אנגייענדע מיליטערישע אקטיוויטעטן אויף עטליכע פראנטן, אריינגערעכנט באמבארדירונגען אין דרום לבנון נאך א חיזבאללא דראון אטאקע אויף טרופן דעם זעלבן טאג. געוויסע שפיאנאזש אפשאצונגען האבן ארויסגעברענגט זארג אז איראן פלאנירט מעגליך א מאסיווע סורפרייז אטאקע ענליך צו די אקטאבער 7 אטאקעס, כאטש באאמטע האבן נישט פובליק באשטעטיגט קיין דעטאלן איבער אזא דראונג.

זמיר האט שוין פריער געזאגט אז מדינת ישראל האט "גרונטליך געטוישט" איר זיכערהייט דאקטרין אין די יארן נאך אקטאבער 7. די יעצטיגע דריל שפיגלט אפ דעם טויש, לייגנדיג די פריאריטעט אויף כסדר'דיגע, אומגעמאלדענע גרייטקייט טעסטן, אנשטאט זיך צו פארלאזן אויף פריערדיגע ווארענונג סיסטעמען אדער אויף די נארישע השערה אז דער פיינט וועט זיך איינהאלטן.