מיט בלויז געציילטע טעג געבליבן צום גרויסן יומא דהילולא קדישא פון מרן רבינו הקדוש והטהור, רבי יואל בן חנניה יו"ט ליפא מ'סאטמאר זיע"א, דערגרייכן די פילפארביגע הכנות אינעם בית החיים אין קרית יואל צום העכסטן שטאפל.

די אטמאספער אויפן ארט איז שוין גרויס, ווען די ספעציעלע עסקנים, זענען פארנומען מיט די הייליגע ארבעט ארום די זייגער צו קענען אויפנעמען די רבבות אלפי ישראל וואס וועלן קומען מתפלל זיין ביים ציון הקדוש.

און באמת שטראמט שוין דער ציבור אין די מאסן צו פוקד זיין דעם ציון, אצינד ווען מען האלט שוין אין די 3 טעג סמוך ליומא דהילולא.

סיי בייטאג און סיי אין די שפעטע נאכט שטונדן קען מען זען א געוואלדיגע 'מצב' ביים ציוה"ק, כדי זיכער צו מאכן אז יעדע קלייניקייט און יעדע צרכי ציבור איז קלאר און מסודר.

כדי צו פארזארגן דעם ריזיגן ציבור מתפללים מיט אלע געברויכן מיט א ברייטקייט, זענען שוין אנגעקומען צום שטח מאסיווע 'סקידס' מיט קאלטע משקאות וואס זענען ספעציעל דעליווערט געווארן דורך די באקאנטע פירמע 'מים חיים'.

פאראלעל זענען אראפגעשטעלט געווארן ריזיגע קאנטעינערס פאר די גארביטש צו אנהאלטן דעם גאנצן שטח ריין און ציכטיג.

באזונדערע מחשבה איז אריינגעלייגט געווארן צו פארגרינגערן פאר ספעציפישע חלקים פונעם ציבור; אזוי אויך איז צוגעגרייט געווארן א נייער ברייטער שטח וואו מען גייט אויפשטעלן א ריזיגן טענט באשטימט נאר פאר די כהנים.

פאר די עלטערע אידן וואס קומען ארויף צום ציון און נויטיגן זיך אין הילף מיט די שפאציר, איז ספעציעל אויפגעשטעלט געווארן א 'גאלף-קאר סטעישאַן' מיט קארטלעך וואס וועלן זיי ארויפטראגן ביז אהין מיט אלע באקוועמליכקייטן.

די הנהלת הבית החיים האט אויך אינזינען געהאט די פרויען וואס ווילן זיך קומען אויסבעטן, און מען האט געמאלדן אז קומענדיגן דאנערשטאג ווי אויך קומענדיגע וואך מאנטאג וועט דער בית החיים זיין אפן און רעזערווירט בלויז פאר נשים צדקניות צו קענען קומען שופך שיח זיין במנוחה.

צו די זעלבע צייט זענען אלע חסד און רפואה ארגאניזאציעס שוין אויפן ארט מיט א פולן קראפט; דאס קאנטראל טרעקל פונעם קרית יואל'ער 'סקוואד' איז אריבערגעפירט געווארן אויסצושטעלן זייער קאמענד צענטער, און טראקס פון אגענטור 'רינועל' שטייען שוין שיין געפארקט על יד הציון גרייט צו סערווירן דעם חלל הציבור.

ווי א קרוין צו די אלע געוואלדיגע צוגרייטונגען, ארבעטן תלמידי ישיבת סניף 'ויואל משה', אינאיינעם ווי ארטיסטן, רונדע די זייגער אהערצושטעלן די פראכטפולע הכנות לכבוד א גרויסארטיגע 'הכנסת ספר תורה', וואס וועט געפראוועט ווערן די טעג מיט גרויס כבוד, משלים זייענדיג דעם גרויסן כבוד שמים וכבוד הצדיק צום קומענדיגן יומא דהילולא.