א רוטינע רייזע האט זיך פארוואנדלט אין א שרעקליכע קאשמאר אין אסט-דרום טערקיי, דעם 27'סטן סעפטעמבער 2026, ווען א פאסאזשירן באס און א פריוואטע קאר האבן זיך צוזאמגעשטויסן אין א שווערע 'העד-און' קראך אויף די גאזיאנטעפ-נורדאגי שאסיי.

דער טראגישער עקסידענט האט פאסירט ארום 6:06 פארנאכטס נעבן די אקאראבא געגנט. דער באס (א 'מיני-באס') איז געווען אויף איר רעגולערע רוט צווישן די שטעט האטיי און גאזיאנטעפ. די רעזולטאטן זענען געווען פאטאל: אלע 7 פאסאזשירן וואס זענען געפארן אין די קאר - פינף ערוואקסענע און צוויי קינדער - זענען אויפן ארט אומגעקומען. צווישן 13 און 16 אנדערע פאסאזשירן פונעם באס זענען פארוואונדעט געווארן און זענען אפגעפירט געווארן אין די לאקאלע שפיטעלער דורך אמבולאנסן, ווען די צאל פון די פארוואונדעטע איז געשטיגן דורכאויס די נאכט.

דער דעפיוטי גאווערנאר פון גאזיאנטעפ, אילקער עקער, האט איבערגעגעבן אז די ערשטע אויספארשונגען ווייזן אז דער דרייווער פון די קאר האט פרובירט צו מאכן אן אומלעגאלע און געפארליכע 'אויווערטעיק' (אריבערצויאגן אן אנדערע קאר), און איז אריינגעפארן אין די קעגנזייטיגע לעין דירעקט אריין אינעם באס. סעקיוריטי קעמערע פוטעדזש וואס צירקולירט אויפן אינטערנעט צייגט טאקע ווי די קאר פארט אריין אינעם באס'ס לעין סעקונדעס פארן קראך.

די קראפט פונעם צוזאמענשטויס איז געווען אזוי שטארק, אז די קאר איז געווארן צודריקט ביז אומדערקענבארקייט, און דער באס האט זיך איבערגעדרייט אויף די זייט. פייערלעשער, מעדיצינישע רעטונגס אגענטורן, לאקאלע פאליציי און עמערדזשענסי מאנשאפטן זענען קורץ דערויף אנגעקומען אויפן סצענע. בילדער פונעם ארט רייסן די הארץ, זעענדיג דעם איבערגעדרייטן באס, די צושמעטערטע קאר, און די קערפערס פון די אומגעקומענע אויסגעלייגט אויפן שאסיי.

באאמטע זאגן אז מ'האלט נאך אינמיטן אידענטיפיצירן די קרבנות און א ברייטערע אויספארשונג גייט אן. נאציאנאלע פירער האבן ארויסגעשיקט טרייסט ווערטער פאר די פאמיליעס. דער טראגישער אינצידענט דינט אלס א ווייטאגליכע דערמאנונג ווי איין ריזיקאלישע באשלוס אויפן הייוועי קען אפקאסטן אזויפיל לעבנס אין בלויז עטליכע סעקונדעס.