אצינד שטייענעדיג נאך קוים א האלבע יאר נאך די ביטערע פארלוסט פונעם הסתלקות פונעם קאסובער רבי'ן, קענען זיך נאך שווער טרייסטן די אלע אידן וואס האבן נהנה געוועהן מאורו הבהיר, מאידך גיסא מיט וואס א טאג עס גייט פאריבער, שטייגט די צמאון ביי כלל ישראל פאר די אייגענארטיגע מהלך וואס די רבי האט אויסגעלערנט אין זיינע תורות און ספרים, וואס איז געוועהן מיוחד פארן הייטיגן דור - עקבתא דמשיחא, און עס האלט אינאיין אריינקומען אן אויסטערלישען פארלאנג פון אידן פון אלע שיכטען און קרייזן, צום מכון שפה ברורה – וואס טוט זיך אפגעבן מיט די עבודת הקודש מפיץ צו זיין תורתו ומשנתו פון רבי'ן דורך די פאפאלערע ספרים און גליונות, ארויס צו געבן נאך פון די תורות און די ספרים פונעם רבי'ן זי''ע.

דערזעענדיג די געוואלדיע ביקוש פאר די תורות פון רבי'ן, גייט די מכון אריין אין א נייע פאזע, אויס צוברייטערן די פעולות, סיי מיטן ארויסגעבן נייע ספרים און גליונות אויף פארשידענע שפראכן פאר יונג און אלט, און סיי אויפבויען די מערכת השיעורים אויף א מסודר'דיגע אופן ווי עס וועלן קענען געהערט ווערן איבער 7 טויזענט שעה פון שיעורים און דרשות וואס די רבי האט איבערגעגעבן במשך ימי חייו, להשקות צמאי חסדך מנהר היוצא מעדן.

ווי באקאנט איז די קאסובער רבי זי''ע, כל ימיו געזעצן און געהארעוועט מיט אן אויסטעלישן התמדה בתורה, און איז כסדר געזעצן מיט זיין פעדער אינעם האנט פארשרייבענדיג זיינע טיפזינעגע חידושים און רעיונות, בכל מכמני התורה - פסקים, תשובות, און בירורים אויף נגלה, און אויף חסידות, פנימיניות, השקפה און הדרכה אין אלע ענינים בעבדות ה', איבערלאזענדיג אן אוצר בלום פון איבער 10 טויזענט בלעטער כתבי ידות, וואס די רבי האט במשך ימי חייו אוועק געלייגט אין א סעיף, למען יעמדו ימים רבים.

און די יעצטיגע טעג האט די מכון אויפגענומען א געניטע שטאב צו סקענען און פאראייביגען די טויזענעטער כתבים בסדר מסודר, וואס ווערט אויסגעפירט מיט גאר טייערע ספיסטעקירטע מאשינען, תחת פיקוחו פון צווי חשובע אייניקלעך פון רבי'ן ה''ה הרב אברהם העשיל אונגער שליט''א, און הרב אברהם יהושע העשיל רובין שליט''א, וואס פון דעם וועט אי''ה ארויס געגעבן ווערן פילע ספרים אין די קומענדיגע יארן.

אט פאר דעם צוועק טוט יעצט די מכון צוזאמרופן א רייכע אווענט דעם ליל שישי משפטים פאר כלל חסידים ותלמידים פון רבי'ן, מיטן נאמען 'ליל התגלות – אוצר גנזיו של רבינו', ווי עס וועט פארגעשטעלט ווערן א גאר מייסטערהאפטיגע פרעזענטאציע 'הביאני המלך חדריו' א בליק אריין אינעם רבין'ס ספרים צימער, צייגענדיג פון דער נאנט די אלע כתבי ידות פונעם רבי'ן, מיט די גייסטרייכע פלענער פונעם מכון פאר די קומענדיגע תקופה, 'להמשיך מורשתו של צדיק שלא תשכך מפי זרעו'.

גדול יהיה כבוד המעמד הזה!