חסידי צאנז און תושבי העיר אין חיפה גרייטן זיך אויפצונעמען פני הקודש פון כ"ק מרן אדמו"ר מצאנז שליט"א, וועלכער קומט היינט מאנטאג ד' אלול אפשטאטן א באזוך אינעם ארטיגן צאנזער בית המדרש.

דער ציל פונעם באזוך איז א צענטראלע קבלת קהל לקראת די קומענדיגע ימים נוראים, און דער סדר איז ספעציעל צעטיילט צווישן קינדער און דערוואקסענע כדי עס זאל צוגיין מיט די גרעסטע מאס רואיגקייט.

די קינדער פון די קהילה וועלן זיך ציזאמנעמען אינעם היכל בית המדרש פונקטליך אום 7:00 ביינאכט.

דער רבי שליט"א ווערט ערווארטעט אנצוקומען ארום 7:15 און וועט גלייך אריינקומען צו א באזונדערן מעמד מיוחד פאר די ילדי תשב"ר.

דארט וועט דער רבי משמיע זיין ברכת הקודש, און דערנאך וועלן אלע קינדער אריבערגיין פני הקודש צו באקומען מיני מתיקה.

באלד נאך א קורצע הפסקה נאכן מעמד מיט די קינדער, וועט זיך אנהויבן די אפיציעלע קבלת קהל פאר די דערוואקסענע בני הקהילה צו קענען אפגעבן א קוויטל און הערן א ברכה.

עס ווערט שטרענג אנגעמערקט אז ביי דעם צווייטן טייל וועלן די חסידים אריבערגיין אינגאנצן אן די קינדער, כדי צו ערמעגליכן אן רואיגע צייט פאר יעדן באזונדער ביים אריינגיין אל הקודש פנימה.