פארשטעלט ווי א חרדי'שער איד: פאליציי ארעסטירט שמוגלער מיט זעקס אומלעגאלע אריינדרינגער נעבן ירושלים

די מדינת ישראל גרעניץ פאליציי האט ארעסטירט א מאן וועלכער האט זיך פארשטעלט ווי א היימישער חרדי'שער איד, אין א פרואוו אריינצושמוגלען זעקס אומלעגאלע אריינדרינגער אין די געגנט פון ירושלים.

לויט די באריכטן, האט דער פארדעכטיגטער זיך ספעציעל געלאזט וואקסן א בארד און אנגעטון א קאפל אויפ'ן קאפ, כדי נישט צו וועקן קיין פארדאכטן ביי די זיכערהייט קרעפטן בשעת'ן דרייוון זיין קאר נעבן ירושלים.

דורכאויס די אפעראציע האבן די אפיצירן אפגעשטעלט דעם קאר און אנטדעקט דערין זעקס פאסאזשירן וועלכע האבן זיך געפינען אין לאנד אומלעגאל אן קיין פערמיטן. ביי די אויספארשונג אויפ'ן ארט זענען די פאליציי אויך דערגאנגען אז דער קאר איז שוין געווען אראפגענומען פונעם ראוד און איז געפארן מיט פאלשע לייסענס פלעיטס.

אלע זיבן פארדעכטיגטע - דער דרייווער און די זעקס פאסאזשירן - זענען ארעסטירט געווארן און אפגעפירט געווארן פאר ווייטערדיגע אויספארשונגען, און דער קאר איז אפגעשלעפט געווארן פונעם סצענע.