הגאון ר' יצחק יוסף מיט א שארפע ווארענונג קעגן שטימען פאר איתמר בן גביר: "עס איז כאילו מען גייט אליינס ארויף אויפן הר הבית"

דער געוועזענער ספרד'ישער הויפט רב, הגאון רבי יצחק יוסף שליט"א, איז ארויסגעקומען מיט א שארפע ווארענונג צו ספרד'ישע ישיבה בחורים וועלכע טראכטן פון שטימען פארן נאציאנאלע זיכערהייט מיניסטער איתמר בן גביר. דער רב האט קלארגעשטעלט אז עס איז שטרענג פארבאטן צו שטימען פאר אים, צוליב זיינע פראוואקאטיווע באזוכן אויפן הר הבית.

ביי אן אסיפה וואס איז פארגעקומען אינעם 'בני הישיבות' בית מדרש אין די שמואל הנביא געגנט אין ירושלים, האט הרב יוסף זיך געוואנדן צו די יונגע וויילער און זיי געבעטן צו פאלגן די אנווייזונגען פון די ספרד'ישע גדולי ישראל און שטימען בלויז פאר די 'ש"ס' פארטיי, און נישט פאר קיין אנדערע פארטייען אינדרויסן פון די חרדי'שע ראמען.

בארירנדיג דעם פאקט אז בן גביר ציט צו זיך אסאך יונגע ספרד'ישע וויילער, האט דער רב געפרעגט מיט וואונדער ווי אזוי בחורים קענען בכלל טראכטן פון שטימען פאר א פאליטיקאנט וואס גייט ארויף אויפן הר הבית קעגן די הלכה. "עס איז אסור צו שטימען פאר אים. ווער עס שטימט פאר אים איז כאילו ער אליינס איז ארויפגעגאנגען אויפן הר הבית," האט הרב יוסף אויסגערופן.

די ווערטער קומען אין א צייט פון גרויסע פאליטישע אנגעצויגנקייטן אין ארץ ישראל, ספעציעל ארום די גזירת הגיוס און די ברוטאלע באנעמונג פון די פאליציי קעגן חרדי'שע פראטעסטירער. אסאך יונגע חרדי'שע וויילער זענען אנטוישט אין די פאליטישע עסטעבלישמענט, וואס האט געברענגט א זארג ביי די ש"ס פירערשאפט אז שטימען וועלן גיין צו די רעכטע פארטייען.

הרב יוסף האט אויך שארף קריטיקירט בן גביר איבער די אכזריות'דיגע אויפפירונג פון די פאליציי קעגן חרדי'שע פראטעסטירער, פרעגנדיג פארוואס דער מיניסטער טוט גארנישט אפצושטעלן די פאליצייאישע ברוטאליטעט קעגן בני תורה.

אין דער זעלבער צייט האט הרב יוסף געווארנט פון די גרויסע סכנה וואס לויערט אויב עס וועט אויפגעשטעלט ווערן א לינקע רעגירונג, און האט אונטערגעשטראכן ווי וויכטיג עס איז ארויסצוגיין שטימען און האבן א שטארקע חרדי'שע רעפרעזענטאציע. ער האט געמוטיגט דעם ציבור נישט נאר צו גיין אליינס שטימען, נאר אויך צו משפיע זיין אויף אנדערע, כדי צו קענען באשיצן די מוסדות התורה און די אינטערעסן פונעם חרדי'שן ציבור.

ביים אסיפה האבן זיך אויך באטייליגט אנדערע חשוב'ע ספרד'ישע רבנים, אריינגערעכנט הגאון ר' יצחק כהן און הגאון ר' חנוך כהן.

דער הויפט מעסעדזש פונעם רב איז געווען אז פאליטישע באשלוסן וואס האבן אן עפעקט אויפן עתיד פונעם חרדי'שן אידנטום דארפן ווערן געפירט דורך די גדולי ישראל, און מען טאר זיך נישט לאזן פירן פון פראסטע אנטוישונג אדער כעס אויף געוויסע רעגירונג פאליסיס.