פרעזידענט טראמפ: אמעריקע בויט צוריק אויף אירע וואפן סטאקפיילס אויף א רעקארד טעמפא נאכן אוועקגעבן א גרויסע טייל פאר אוקראינע

פרעזידענט טראמפ האט געמאלדן אז א גרויסע טייל פון אמעריקע'ס "עליטע" וואפן, אריינגערעכנט די פארגעשריטענע פאטריאט מיסילס, זענען טראנספערירט געווארן קיין אוקראינע, אבער ער האט באטאנט אז די פאראייניגטע שטאטן פראדוצירט זיי יעצט אויף אן אומגעהערטן פארנעם כדי צוריק אויפצובויען די אויסגעליידיגטע סטאקפיילס.

"ווען עס קומט צו די עליטע וואפן, איז א גרויסע טייל פון דעם געגעבן געווארן פאר אוקראינע - אבער מיר פראדוצירן עס יעצט גאר שנעל. מיר בויען אויף אונזער סטאקפייל אויף א שנעלן טעמפא. יעצט מאכן מיר מער פאטריאטס ווי מיר האבן נאר אמאל געמאכט," האט דער פרעזידענט געזאגט.

די קאמענטארן שפיגלען אפ א טויש פון אויסליידיגן די אמעריקאנער וואפן אינווענטארי, צו אן אגרעסיווע אינדוסטריעלע פארברייטערונג. באאמטע ווייזן אן אז די אמעריקאנער ארמיי קאנטראקטן מיט די ריזיגע וואפן פירמע 'לאקהיד מארטין' צילן צו פארדרייפאכן די פראדוקציע פון די פארגעשריטענע פאטריאט מיסילס, פון ארום 600 צו 2,000 א יאר ביז יאר 2030.

דער פרישער שטופ קומט אין א צייט פון ברייטערע פיל-יעריגע באמיאונגען נאכצוקומען די שטייגנדע גלאבאלע פארלאנגען פאר די וואפן. בשעת די הילף פאר אוקראינע האט געשלעפט פון די עקזיסטירנדע סטאקס, האט א פרישע אנאליז אנגעוויזן אז די שווערע באנוץ פון פאטריאטס דורכאויס די 2026 מיטל מזרח אפעראציעס קעגן איראן איז געווען נאך א הויפט אורזאך פאר די אויסליידיגונג פונעם אמעריקאנער ארסענאל.

צוריק אנצופילן די מיסילס איז דעריבער געווארן א לאנג-טערמין פריאריטעט פארן פענטאגאן. די פארנעם פון די געפלאנטע פארמערונג ברענגט אבער ארויף פראגעס ווי שנעל די נייע פראדוקציע וועט אריינגיין אין קראפט, צי עס וועט אינגאנצן צוריקשטעלן די אינווענטארי צו די שטאפלען פון בעפאר די קאנפליקטן, און ווי אזוי די פארברייטערטע פראדוקציע וועט באלאנסירן די קאמיטמענטס פאר אליאירטע לענדער אינאיינעם מיט די געברויך צו האלטן אמעריקע'ס אייגענע פארטיידיגונגס סיסטעמען פולשטענדיג אנגעפילט.