דער ווייסע הויז בארדער צאר, טאם האומען, זאגט אז א פלאן צו אונטערנעמען שטרענגע שריט קעגן קאמפאניס וואס נעמען אויף אומלעגאלע ארבעטער איז שוין אפגעשריבן און ליגט גרייט ביים 'דעפארטמענט אוו האומלענד סעקיוריטי' (DHS), ווארטנדיג צו ווערן אריינגעשטעלט אין קראפט. האומען זאגט אז ער האפט אז די אגענטור וועט זיך רוקן דערויף גאר בקרוב, און ער לייגט א שטארקע דרוק אז דאס זאל פאסירן. לויט אים, איז די חשבון זייער פשוט: די הויפט זאך וואס שלעפט אומלעגאלע אימיגראנטן קיין אמעריקע איז די ארבעטס מעגליכקייטן, און אויב זיי וועלן נישט קענען טרעפן קיין דזשאבס, וועלן זיי אויפהערן קומען.

האומען, וועלכער האט אין די פארגאנגענהייט אנגעפירט די 'אייס' (ICE) אגענטור, ווייזט אן אויף די מאסיווע אבלאווע וואס איז פארגעקומען אין סעפטעמבער 2025 ביי א 'יונדיי' באטעריע פלענט אין דזשארדזשיע אלס א ביישפיל פון וואס מען קען ערווארטן. ביי יענע אפעראציע זענען ארעסטירט געווארן 475 מענטשן, וואס DHS האט דעמאלטס אראפגעשטעלט אלס די גרעסטע אפעראציע אויף איין לאקאציע אין איר היסטאריע. די ארבעטער זענען אנגעקלאגט געווארן פארן בלייבן אין לאנד נאכדעם וואס זייער וויזע איז אפגעלאפן און פארן ארבעטן אומלעגאל.

אין די לעצטע מאנאטן האט האומען אראפגעלייגט א פלאן וואס וועט פארברייטערן די אינספעקציעס אויף די 'I-9' פארמען (וואס באשטעטיגט אז אן ארבעטער מעג לעגאל ארבעטן אין לאנד), מעגליך דורך נוצן קאנטראקטארס, און זיך קאנצענטרירן אויף בויען קרימינאלע קעיסעס קעגן בעלי בתים וואס ברעכן דעם געזעץ מיט א וויסנדיגקייט. דערווייל זענען זיינע ווערטער נאך נישט קיין אפיציעלע אנווייזונגען פאר ICE, און עס איז נאך נישט קלאר פונקטליך ווען די נייע אפעראציעס וועלן זיך אנהייבן.

שטיצער פון דעם פלאן טענה'ן אז א שטרענגערע קאנטראל אויף ארבעטס-פלעצער באשיצט די געהאלטן פון אמעריקאנער בירגער און מאכט זיכער אז קאמפאניס נעמען פאראנטווארטליכקייט. פון די אנדערע זייט, האבן ביזנעס גרופעס און אינוועסטארס ארויסגעשטעלט א שטארקע קעגנערשאפט, ווארענענדיג אז דאס קען פירן צו א מאנגל אין ארבעטער און ברענגען עקאנאמישע שאדנס.

די אדמיניסטראציע אליינס האט פאראיאר צייטווייליג אפגעשטעלט אבלאוועס אויף פארמס, האטעלן און רעסטאראנען צוליב די זארגן, און די 'יונדיי' אפעראציע האט אויך אנגעמאכט דיפלאמאטישע רייבונגען מיט סאוט קארעא. די גרויסע פראגע יעצט איז צי DHS וועט טאקע ארויסגיין דעמיט למעשה, און וויפיל קאמפאניס און בעלי בתים וועלן אריינפאלן אינעם נעץ אויב יא.