ווידעאו פון א שווימענדיגע קאר גייט וויירעל און ברענגט ארויף פרישע קריטיק קעגן טעסלא

א ווידעאו ווי א ריזיגע לוקסוריעזע SUV שווימט אויף א טייך פונקט ווי א שיפל מאכט יעצט כוואליעס אויפן אינטערנעט. דער שטערן פונעם ווידעאו איז דער 'Yangwang U8' פונעם כינעזישן קאר פראדוצירער 'BYD', א פלאג-אין הייבריד קאר מיט קרוב צו 1,200 הארס-פאוער, וואס ווערט פארקויפט אין כינע פאר ארום 150,000 דאלאר.

די קאר פארמאגט א ספעציעלע "עמערדזשענסי שווימען מאוד" וואס צינדט זיך אן אויטאמאטיש ווען די קאר שפירט אז דאס וואסער איז טיפער ווי איר לימיט. אין אזא פאל לעשט זיך דער גאזאלין מאטאר אויס, די סוספענשען הייבט זיך אויף צום העכסטן שטאפל, און די פענסטערס מאכן זיך צו. דער סאנרוף עפנט זיך אלס אן אנטלויף-וועג, און די קאר קען בלייבן שווימען אויפן וואסער פאר ביז 30 מינוט, רוקנדיג זיך פאראויס מיט א שנעלקייט פון ארום 3 קילאמעטער א שעה דורכן דרייען די רעדער.

דאס איז נישט סתם א 'קאנצעפט' קאר; די U8 איז שוין א פראדוקציע-גרייטע מאדעל וואס ווערט פארקויפט זינט 2023 און קומט מיט אן IP68 רעיטינג. אבער BYD ווארנט אז די פיטשור איז בלויז געמאכט פאר עמערדזשענסיס ווי פארפלייצונגען און רואיגע וואסערן, און זיי הייסן די אייגנטומער אריינברענגען די קאר צו א סערוויס צענטער פאר אן אינספעקציע נאכן נוצן די שווימען אפציע.

אויפן אינטערנעט נוצט מען דעם קליפ צו שטעכן טעסלא, וועמענ'ס לאנג-ערווארטעטע 'ראודסטער' מאדעל האט נאך אלץ נישט דעגרייכט פראדוקציע, נאך כמעט א יארצענדליג פון פארהאלטונגען זינט עס איז געווארן געמאלדן אין 2017 מיט א 50,000 דאלאר דיפאזיט פראגראם. טעסלא האט ענדליך געוויזן איר נייע ראודסטער ביי אן איווענט אין טעקסאס דעם 15'טן אקטאבער 2026, קאמפלעט מיט ראקעט-סטייל טראסטערס און א סטאנט דעמא, אבער אילאן מאסק האט געזאגט אז פראדוקציע וועט זיך נישט אנהייבן ביז 2028 און ער האט נישט געגעבן קיין ענדגילטיגע פרייז.

די וואס גלייכן דעם פארגלייך זאגן אז עס צייגט דעם חילוק צווישן פראקטישע אינאוואציע וואס מען קען שוין היינט קויפן, קעגן פוסטע צוזאגונגען וואס ווערן כסדר אפגעשטיפט. פון די אנדערע זייט זענען דא וואס ווייזן אן אז די צוויי קארס זענען בכלל נישט קיין קאנקורענטן; איינס איז א רעטונגס-פיטשור אויף א פאמיליע SUV, און די אנדערע איז א הייפער-קאר געצילט צו ברעכן רעקארדס.

סקעפטיקער לייגן אויך צו אז די שווימען טריק פונעם U8 איז נאר א לעצטע מיטל און נישט קיין לייסענס צו גיין שווימען, און אז דערווייל ווערט עס נאר פארקויפט אין כינע. אבער ווי אזוי מען קוקט עס נאר אן, האט דער ווידעאו פריש אויפגעפלאמט דעם דעבאטע צי די צוקונפט פון קארס באלאנגט צו דרייסטע דעמאס אדער צו פאקטישע פיטשורס וואס גרייכן למעשה די גאסן.