בס"ד

שטורעם און אויפברויז נאכדעם וואס ניו יארק סיטי מעיאר זאהראן מאמדאני נוצט דעם אקטאבער 7 יארטאג צו אטאקירן מדינת ישראל

ניו יארק סיטי מעיאר זאהראן מאמדאני האט ארויסגעגעבן א סטעיטמענט אפצוצייכענען דעם דריטן יארטאג פון די בלוטיגע אקטאבער 7 שמחת תורה אטאקעס, אבער אנשטאט ארויסצוצייגן סימפאטיע פאר די אידישע קאמיוניטי, האט ער גענוצט די געלעגנהייט צו שארף אטאקירן און פארדאמען מדינת ישראל.

אין זיין מעסעדזש האט דער מעיאר אנגעהויבן מיט א קורצע דערמאנונג פון די קרבנות, זאגנדיג אז דער טאג איז זייער ווייטאגליך פאר פילע ניו יארקער, און אז חמאס טעראריסטן האבן אומגעברענגט מער ווי 1,100 אידן און פארכאפט 251 אנדערע. אבער כמעט גלייך דערויף האט מאמדאני געמאכט א שארפע דריי, זאגנדיג אז די ליידן האט זיך נישט אנגעהויבן אדער געענדיגט יענעם טאג, און ער האט געווידמעט דעם גרעסטן טייל פון זיין סטעיטמענט צו באשולדיגן די מדינה אין א "אנגייענדע דזשענאסייד" אין עזה.

דער מעיאר האט אנגעגעבן אז איבער 74,000 פאלעסטינער זענען שוין אומגעקומען, אריינגערעכנט מער ווי 21,000 קינדער. ער האט ווייטער געטענה'ט אז איבער 1,400 פאלעסטינער זענען געהרגעט געווארן אפילו נאך א אזוי-גערופענע פייער-אפשטעל, און האט אויסגערעכנט א רייע באשולדיגונגען קעגן די מדינה, ווי באמבארדירן אמבולאנסן, צילן רעזידענשעל געביידעס און דזשורנאליסטן, און צוריקווייזן הילף פון עסנווארג. דער מעיאר האט געשלאסן זיין סטעיטמענט מיט א רוף קעגן "אקופאציע און אפארטהייט", און האט אראפגעריסן די אמעריקאנער וואפן שיפמענטס קיין ארץ ישראל אלס א שותפות פון די פעדעראלע גאווערנמענט אין "קריגס פארברעכנס".

שארפע קריטיק און פארדאמונגען

די סטעיטמענט האט ארויסגערופן א שטורעם פון אויפברויז. אן עדיטאריעל אין 'ישיבה ווארלד ניוז' האט שארף פארדאמט דעם מעיאר'ס ווערטער, אנרופנדיג עס א דירעקטע באליידיגונג פאר אידישע ניו יארקער אויפ'ן טונקעלסטן טאג פאר כלל ישראל זינט דעם האלאקאוסט.

די עדיטאריעל האט אנגעוויזן אז מאמדאני האט קוים געווידמעט דריי זאצן פאר די קרבנות פונעם שוידערליכן מאסאקער, בעפאר ער האט אויסגענוצט דעם יארטאג צו פראמאטן זיין לאנג-יעריגע פאליטישע אגענדע קעגן מדינת ישראל. קריטיקירער האבן ארויסגעברענגט אז דער מעיאר פון די שטאט וואס פארמאגט די גרעסטע אידישע באפעלקערונג אינדרויסן פון ארץ ישראל, וואלט געדארפט קענען פשוט קלאגן די אומגעקומענע, געדענקען די קרבנות, און ארויסצייגן שטיצע פאר די איבערלעבער, אן פארוואנדלען דעם טאג אין א פאליטישע אטאקע קעגן די אידישע מדינה.

די עדיטאריעל האט עס צוגעגליכן צו א מעיאר וואס זאל אפצייכענען דעם סעפטעמבער 11 טעראר אטאקע יארטאג דורך אויסרעכענען אמעריקאנער אומרעכטן אין אויסלאנד, און האט אנגערופן זיין אויסוואל פון טיימינג "טיף אומריכטיג". די ארטיקל האט זיך געשלאסן מיט די ווערטער אז אידישע ניו יארקער האבן פארדינט פיל בעסער פון זייער מעיאר אין א טאג וואס פשוט'ע מענטשליכקייט פאדערט צו לייגן פאליטיק אין די זייט.