בס"ד

שבת קודש מלא התרוממות והתעלות געפראוועט געווארן צום ערשטע מאל אין שטאט קרית יואל בצל כ"ק אדמו"ר מקאשוי שליט"א

תושבי קרית יואל האבן געהאט די זכיה מיטצולעבן אן ערשטמאליגע שבת פון התרוממות הנפש והתעלות בראשות כ"ק מרן אדמו"ר מקאשוי שליט"א, וועלכע האט צום ערשטע מאל אפגעראכטן א שבת אינאיינעם מיט תלמידיו ומעריציו אין שטאט קרית יואל יצ"ו, וועלכע איז א צענטער פון פילע תלמידים וחסידים ויוצאי ישיבת קאשוי, וואס טראגן אויף זיך דעם הייליגן חותם און גייען אן מיט שטאלץ די הייליגע וועגן.

די געטרייע עסקנים האבן אריינגעלייגט איבערמידליכע כוחות די שבת זאל געקרוינט ווערן מיט די העכסטע מאס הצלחה, ב"ה אז עס איז טאקע געלונגען אהערצושטעלן א העכסט געלונגענע אפאראט, צוברענגענדיג דעם שבת צום קלימאקס. באזונדער איז אריינגעלייגט געווארן כוחות אהערצושטעלן די היכל השולחנות והתפילות וואס איז אויסגעשטעלט געווארן מיט די מאקסימום זיץ-פלעצער מעגליך.

צום שבת איז אויך ארויסגעקומען א ספעציעלע גליון וואס האט ערהאלטן א אוצר בלום מיט דברות קודש ממרנן רבותינו הק' נבג"ע. אזוי אויך עטליכע תורות אויף די פרשה פון רביה"ק מקאשוי זי"ע מכתב יד קדשו וואס איז נאכנישט געדרוקט געווארן ביז היינט. און א ספעציעל אינטערסאנטע מאמר וועלכע האט רייך געשילדערט די שב"ק פרשת עקב שנת תשל"ט, קנאפע צוויי וואכן פארן הסתלקות פון הרה"ק מסאטמאר זי"ע, ווען רביה"ק מקאשוי זי"ע האט געוויילט בצל תומר אין קרית יואל.

רבינו שליט"א האט דערגרייכט די שטאט קרית יואל ערב שבת אין די נאכמיטאג שעות, די אכסניא איז געווען אין שטוב פון הרבני הנגיד הרה"ח ר' יוסף פנחס סטרולאוויטש שליט"א. שפעטער נאכמיטאג האט הרבני הנגיד ר' וואלף לעפקאוויטש הי"ו מחשובי תלמידי רביה"ק זי"ע, אריבערגעברענגט דעם קליינע ספר תורה פון הרה"ק רבי איציקל מפשעווארסק זצוק"ל מגזני אוצרו הטוב, און האט דאס פארבארגט צום באנוץ במשך דעם גרויסן שבת, דער רבי האט זיך שטארק באדאנקט וואונטשנדיג ברכות לרוב.

ארום 20 מינוט נאכן זמן הדלקת הנרות האט זיך דער רבי ארויסגעלאזט פונעם אכסניא אויפן וועג צום היכל התפילות ושולחנות אין ביהמ"ד היכל יצחק אויף פארעסט ראוד, אויפ'ן וועג האט זיך פארמירט הערליכע שמועסן אינאיינעם מיט די אנוועזנדע, ווען מען האט ארומגערעדט סיפורי צדיקים ומנהגי קודש.

ליל שבת קודש

דער רבי שליט"א איז אריינגעקומען אין ביהמ"ד, און געזאגט שיר השירים, דערנאך געמאכט דעם ברכה אויפ'ן טלית און זיך מתעטף געווען כנהוג, און יורד געווען לפני התיבה צו תפילת מנחה בלהבת אש קודש ובהתעוררות ר"ב. דער בית המדרש איז געווען אנגעפאקט פון ברעג צו ברעג, נישט קענענדיג נאכקומען די גרויסע פארלאנג פון פלעצער, וויפיל מען האט נאר צוגעלייגט כסדר איז די פארלאנג געשטיגן פילפאכיג.

צו תפילת קבלת שבת איז צוגעגאנגען הרה"ח ר' אברהם יהושע פריינד שליט"א מנאסויד, וואס האט אריינגעצויגן דעם ציבור המשתתפים אין א הערליכע שבת'דיגע געשמאק, ווען מיט די נעימות'דיגע שטימע האט ער אראפגעלייגט א ווארימע קבלת שבת, בפרט ביי די ניגונים פון לכה דודי. נאכ'ן דאווענען איז דער ציבור און געסט אריבער שלום נעמען פון רבי'ן שליט"א, און געוואונטשן גוט שבת, ווען דער רבי נעמט יעדעם אויף במאור פניו און וואונטשט צוריק בברכת שבתא טבא.

דערנאך איז פארגעקומען די סעודה ליל שב"ק פאר אלע חשוב'ע געסט, און בחורי חמד, באשיינט דורך די משמשים בקודש אין שפיץ פון בני כ"ק מרן רבינו שליט"א. די סעודה איז געווען צוגעשטעלט אויף א ברייטן פארנעם אינעם ספעציעל דעזיגנירטן זאל, ווי מען איז געזיצן אינאיינעם בשבת אחים גם יחד, און פארברענגט בשירות ותשבחות און דברי תורה.

תערוך לפני שלחן

ארום 9:20 איז דער רבי אריינגעקומען אין היכל בית המדרש צו עריכת שולחן הטהור, עס איז געווען פארזאמלט א ריזן ציבור תושבי קרית יואל חסידים ואנשי מעשה פני ונכבדי העדה פון אלע יארגענג, וואס זענען געקומען מיטהאלטן דעם געהויבענעם טיש פון אנהייב ביז צום סוף. באזונדער האט זיך אנגעזען נכדי רביה"ק מקאשוי זצוק"ל וועמען דער רבי האט מכבד געווען בכבוד הראוי. במשך די טיש איז געווען א כסדר'דיגע שטראם פון אידן וואס זענען געקומען פון אלע געגנטער צו זען פונדערנאנט און זיך מיטווארעמען באור זיו קדושת השבת מנהר היוצא מעדן. 

דער רבי האט אנגעהויבן מיט שלום עליכם מיט'ן מקובל'דיגע נוסח, ווען דער גאנצע ציבור ווערט אריינגעשלעפט אינעם לעכטיגן שבת, אינאיינעם מיט די בחורי חמד ואברכים יקרים אויף די הויכשטאקיגע פארענטשעס, זינגענדיג די זמירות בקול אדיר ונעים.

די רבי האט קידוש געמאכט בקול רם. מיט הגבהת הכוס צו קידוש איז נתכבד געווארן בנו הרב רבי שלום יהושע העשיל בלום שליט"א.

נאך נטילת ידים האט מען אויפגעגעבן די מאכלים. דורכאויס דעם טיש האבן א קבוצה פון תלמידי ישיבה גדולה אנגעפירט מיט די ניגונים וואס איז געזינגען געווארן צווישן די מאכלים. דער רבי האט געטרינקען לחיים און אנגעווינטשן, אזוי אויך געטיילט שיריים פון די פערפל כנהוג.

מיט זמירות האט די רבי מכבד געווען; מנוחה ושמחה דעם משב"ק הרב ר' ישראל אליעזר קלאר שליט"א, מה ידידות כ"ק אדמו"ר מתפארת יחזקאל שליט"א. צור משלו הר"ר אברהם צימערמאן שליט"א. תנו שבח הגה"צ אבד"ק שארמאש שליט"א. קה רבון בנו הרב רבי שלום יהושע העשיל שליט"א,. קה אכסוף הרב רבי יואל יהושע העשיל בלום שליט"א, בן כ"ק אדמו"ר מתולדות רפאל קאשוי.

נאך די זמירות האט דער רבי משמיע געווען דברי דרוש ואגדה פאר א לענגערע צייט, איבער די געוואלדיגע כח התפילה און וויפיל מען קען אויס'פועל'ן ביים דאווענען צום אויבערשטער,

מיט שיר המעלות איז מכובד געווארן הר"ר דוד קליין שליט"א. ברכת המזון על הכוס – בנו הרב רבי אהרן שליט"א. 

נאכ'ן בענטשן האט מען מכבד געווען מיט תנו שבח הר"ר קלמן טייטלבוים שליט"א, דערנאך האט מען אריינגעברענגט פירות, מען האט געזונגען עטליכע ניגונים לכבוד שבת קודש. און דער ציבור איז דורכגעגאנגען נעמען פירות. מיט רננו צדיקים האט דער רבי מכבד געווען הרבני הנגיד ר' אברהם מאיר מיללער הי"ו, און מען האטזיך ארויסגעלאזט אין  א ריקוד אויף די באקאנטע סטראפקאווע ניגון המקובל, דערנאך איז דער רבי אהיים לבית האכסניא.

וביום השבת

שב"ק אינדערפרי איז דער רבי שליט"א געגאנגען אין מקוה בבית האכסניא. און שפעטער אריינגעקומען צו תפילת שחרית בשעה 8:45 און פארגעזאגט ברכות. פסוקי דזמרה האט פארגעדאוונט הרה"ח ר' ישראל אליעזר קלאר שליט"א משב"ק תפילת שחרית האברך הר"ר אברהם מרדכי היימליך הי"ו.

דער רבי איז צוגעגאנגען צו פתיחת הארון און ארויסגענומען די הייליגע ספר תורה וואס איז גענוצט געווארן דורך הרה"ק רבי איציקל מפשעווארסק זי"ע, בעל קורא האברך ר' אברהם יהוסף שווארץ הי"ו. מיט די עליות זענען נתכבד געווארן כהן האברך ר' יודל ראזענבערג הי"ו, לוי הר"ר אברהם מרדכי היימליך. שלישי הרה"ג רבי יואל מייזעלס שליט"א, רביעי - הר"ר משה טעללער שליט"א. חמישי הר"ר ישראל אליעזר קלאר שליט"א משב"ק לרגל הולדות נכדתו למז"ט. שישי כ"ק רבינו שליט"א. דער רבי האט געמאכט א מי שבירך פאר אלע געסט און פני העדה, אזוי אויך פאר אלע תלמידים און בחורים, און ספעציעל פאר'ן בעל אכסניא ובני משפחתו. שביעי הר"ר אליעזר היילברוין שליט"א, אחרון הבחור בנש"ק אלכסנדר דוד לייפער ני"ו, מפטיר דער בעל אכסניא הרבני הנגיד ר' יוסף פנחס סטרולאוויטש הי"ו וועלכע האט געש'נדר'ט א גרעסערע סכום נכבד לטובת הקהלה והמוסדות, און האט אויך פארגעדאווענט תפלת מוסף לקראת די יארצייט פון זיין מוטער ע"ה. הגבה הר"ר שמעון אליעזר לעבאוויטש הי"ו, גלילה הר"ר יחזקאל באכנער הי"ו. פתיחה ביי אנעים זמירות הר"ר יעקב מאיר יצחק סטרולאוויטש הי"ו.

נאכ'ן דאווענען איז מען אריבער זאגן גוט שבת, און מען האט אהיימבאגלייט דעם רבי'ן צום בית האכסניא, וואו עס איז אפגעראכטן געווארן א הערליכע סעודה אינאיינעם מיט די בעל אכסניא ובני משפחתו, און די משמשים בקודש.

במשך די סעודה האט מען ארימגערעדט בדברי תורה וסיפורי צדיקים, וזכרונות מימי קדם פון די פריערדיגע צדיקי הקודמים, ובפרט פון רביה"ק מקאשוי זי"ע.

מיט הגבהת הכוס צו קידוש איז נתכבד געווארן דער בעל אכסניא הר"ר יוסף פנחס סטרולאוויטש הי"ו. מיט די זמירות האט די רבי מכבד געווען די בני המשפחה. פאר'ן בענטשן האט זיך רבי ארויסגעלאזט אין א טאנץ, אנכאפנדיג פון די צוויי זייטן די תלמידי הישיבה אייניקלעך פונעם בעל אכסניא. דערנאך האט דער רבי פארגעלערנט כנהוג די דריי ספרים נועם אלימלך, קדושת לוי, און עבודת ישראל, מיט ברכת המזון איז נתכבד געווארן דער בעל אכסניא.

רעוא דרעוין

דער רבי איז אריינגעקומען צו תפילת מנחה ארום צען צו פינף. ווען די ביהמ"ד איז געווען פיל געפאקט מיט א שטראם פון אידן הצמאים לשמוע את דבר ה', וואס זענען געקומען מיטצוהאלטן די זמן רעוא דרעוין און הערן די דברות קודש און מיטהאלטן די ווארעמע זמירות.

צו תפילת מנחה איז צוגעגאנגען הר"ר מנחם געלב הי"ו. פתיחה רבינו שליט"א, בעל קורא הר"ר משה ווייס הי"ו מראה"ק קאשוי אב"י בעיר וויליאמסבורג. כהן האברך ר' יואל כ"ץ הי"ו, לוי הר"ר נחום יואל שטערנפעלד הי"ו, שלישי הרבני הנכבד הר"ריואל אליהו שווארץ הי"ו. הגבה רבינו שליט"א, גלילה הב' חיים אריה באכנער ני"ו.

נאך מנחה האט מען זיך געוואשן צו שלש סעודות, עס איז געווען צוגעשטעלט לחם משנה און צוגעהער בהרחבה לכל הקהל הקודש אויף א ברייטן פארנעם. די עסקנים האבן מכבד געווען דעם גאנצן ציבור איש על מחנהו ואיש על דגלו. דער רבי האט אנגעהויבן מיט די זמירות, בני היכלא דכסופין, ווען דער גאנצער עולם זינגט מיט אינאיינעם מיט אן אש להבה.

מיט די זמירות איז נתכבד געווארן ברוך קל עליון הר"ר משה ווייס הי"ו, דרור יקרא הר"ר יוסף פנחס סטרולאוויטש הי"ו, אודה בנו הרב רבי אהרן שליט"א, מען האט געזינגען דעם באקאנטע ניגון דביקות והתעוררות ניגון מקובל פון הרה"ק רבי מיכל מזלאטשוב זי"ע. ידיד נפש בנו הרב רבי שלום יהושע העשיל שליט"א.

ביי די דברות קודש האט די רבי צוערשט זיך געשטעלט אויף די פסוקי הפרשה, און דערביי אויסגעשמועסט אז ווען מען קומט זיך צוזאם ביי אזא שבת און מען טרעפט זיך אינאיינעם חסידים ותלמידים פון רבי'ן זי"ע, איז די פאסיגע זאך ארומצורעדן און אויסשמועסן אינאיינעם ענינים וואס דער רבי זי"ע פלעגט רעדן און פארלאנגען. דערביי האט ער ארומגערעדט מיט לענגערע דברי כיבושין בחיזוק והתבוננות און דברי הדרכה צום אנהייב יאר, סיי בעניני לימוד התורה, סיי בעניני תפילה, סיי מיט די נסיונות הזמן, ועניני אמונה, מידות טובות, ענינים הנוגעים בין אדם לחבירו ובין אדם למקום. און איבער די שעדליכקייט פון פארשווענדן די צייט מיט הבלי העולם הזה זייענדיג פארזונקען אין נייעס און תאוות, און די וויכטיגקייט אויסצונוצן די טעג און די וואכן פאר התעלות בעבודת ה'. אזוי אויך נאך פארשידענע ענינים הצריכים חיזוק, און צוגעענדיגט מיט ברכות לרוב פארן גאנצן עולם, מען זאל געהאלפן ווערן מיט אלעס וואס מען דארף, און זוכה זיין צו רב תענוג ונחת מיט פרנסה והרחבת הדעת, וכל הברכות האמורות בתורה.

מיט קל מסתתר האט די רבי מכבד געווען הר"ר יעקב מאיר סטרולאוויטש הי"ו, אין כאלוקינו הרב משה יעקב קאהן שליט"א, שיר המעלות הר"ר שמעון אליעזר לעבאוויטש הי"ו. מיט הגבהת הכוס איז מכובד געווען הר"ר יחזקאל פאשקעס הי"ו, נאכן בענטשען האט מען געדאוונט תפילת מעריב אינאיינעם בקול רם. נאך מעריב איז מען אריבער וואונטשן א גוטע וואך און א גוט יאר, ווען דער רבי וואונטשט צוריק במאור פנים פאר יעדן באזונדער און זיך באדאנקט פאר די באטייליגטע און די עסקנים פארן ארויסהעלפן און מיטהאלטן ביים שבת קודש בשב"ת אחים.

דער רבי האט געמאכט הבדלה, הגבהת הכוס איז מכובד געווארן הבה"ח גרשון יאקאבאוויטש ני"ו. די הבדלה האט געהאלטן הילד ישכר דוב יאקאבאוויטש נ"י, נאך הבדלה האט מען געזינגען המבדיל און מען האט געזאגט אינאיינעם ויתן לך. דערנאך האט מען ארויסבאגלייט דעם רבי'ן בשירה ובזמרה נאך אזא געהויבענעם שבת, "אשרינו מה טוב חלקינו", אז מען האט געהאט די זכיה מיטצולעבן אזא געהויבענעם שבת אינאיינעם.

עכבו עלי יום אחד – סעודת מלוה מלכה וכינוס מרעים

שפעטער ביינאכט זענען זיך צוזאמגעקומען א ריזן ציבור תלמידים, ביים ספעציעלן סעודת מלוה מלכה וכינוס מרעים פאר תלמידי אברכים יוצאי הישיבה הקדושה, מען האט פארברענגט בשבת אחים גם יחד אויף א פריוואטן פארנעם אינאיינעם מיט'ן רבי'ן שליט"א דער ראש הישיבה כאב על בנים ירחם. דער רבי איז אריינגעקומען צו די מלוה מלכה ארום צען אזייגער און זיך געוואשן צו סעודת מלוה דמלכה.

עס האבן שלום גענומען די תלמידים וואס האבן נישט מיטגעהאלטן די שבת ביז יעצט, ווי דער רבי האט יעדן באגריסט בסבר פנים מאירים. עס איז געווען א הערליכער מחזה הוד צו זען הונדערטער יונגעלייט זיצן אינאיינעם בשבת אחים ומלכם רבינו שליט"א בראשם, און פארברענגט אינאיינעם בשירות ותשבחות, בדיבוק חברים. ווי אויך האבן די תלמידים געהאט די זכיה צו רעדן פריוואט מיטן רבין דורכאויס די מלוה מלכה און מקבל זיין זיין ברכת קדשו.

דער רבי האט געוואונטשן לחיים פארן גאנצן ציבור, און מען האט געזינגען די זמירות. נאך די זמירות האט דער רבי מכבד געווען הרה"ג ר' יואל מייזעלס שליט"א, משפיע בישיבתינו הקדושה, ער זאל ארויסברענגען די נחיצות פון די היינט נאכטיגע מסיבה. דער חשוב'ער משפיע האט ארויסגעברענגט איבער די שטארקע דיבוק חברים וואס מען דארף האבן, און אז דורך דעם וואס מען האלט זיך אינאיינעם קען מען אנגיין מיט'ן טעגליכן עבודת היום, און אזוי אויך די זכיה וואס מען האט צו זיין דבוק צום רבי'ן, זייענדיג מאריך במתק לשונו מפי ספרים וסופרים.

דערנאך האט אויפגעטרעטן איינער פון די חשובע יונגעלייט הר"ר דוד ארי' שווארץ הי"ו מחשובי יוצאי הישיבה, וואס האט באגריסט די חשוב'ע חברים און ארויסגעברענגט די זכיה וואס מען האט געהאט בייצוגעוואוינען אזא געהויבענע שבת וואס מען האט מיטגעלעבט. ארויסברענגענדיג אז מען דארף ווייטער אנהאלטן די התעוררות, און אנקניפן א ווייטערדיגע קשר און אחדות פון תלמידי ויוצאי ישיבת קאשוי אין שטאט קרית יואל, זאגנדיג אז מען ארבעט אצינד מען ארבעט אצינד אויף פארשידענע פעולות לטובה, פאר די תלמידים יוצאי הישיבה אין שטאט.

דערביי האט ער מיט עקסטאז געבראכן געווארן די בשורה מרנינה, אז מען גרייט זיך אי"ה בקרוב צו גומר זיין אויף א מקום מוכשר פאר א נייעם בית המדרש אין שטאט קרית יואל לתלמידי הישיבה ואנ"ש, וואו מען וועט אינאיינעם בקביעות פארברענגען בשבת אחים יעדן שבת, אזוי ארום קענען מיטצונעמען דעם יעצטיגן לעכטיגן שבת אויף ווייטער. וואס ווי פארשטענדליך וועט דאס נאר קענען מצליח זיין מיט די הילף פון יעדן יחיד.

נאכדעם האט מען געהאט די זכיה צו הערן עטליכע דברי ברכה און סיפורי צדיקים פונעם ריש מתיבתא כ"ק אדמו"ר שליט"א. מיט ברכת המזון איז נתכבד געווארן האברך החשוב ר' יהוסף ענגעלמאן הי"ו לרגל שמחת הולדת בנו, נאכ'ן בענטשן זענען אלע תלמידים אריבערגעגאנגען וואונטשן א גוטע וואך און זיך געזעגנט מיט ברכות לרוב.

אזוי אויך זענען אריין בקודש פנימה א קבוצה פון עסקנים איבערצוגיין די ווייטערדיגע פלענער פארן נייעם ביהמ"ד למען הרחבת גבולי הקדושה אין שטאט קרית יואל. אויפ'ן וועג ארויס האט דער רבי זיך באדאנקט פאר'ן חשוב'ן בעל אכסניא, הר"ר יוסף פנחס הי"ו ובני משפחתו, פאר'ן צושטעלן זיין דירה פאר'ן שבת ביד רחבה מיט אלע באקוועמליכקייטן, און אנגעוואונטשן ספעציעל א ברכת מזל טוב צום חתונה פון אן אייניקל דעם קומענדיגע וואך אין קרית יואל.

בחצות הלילה האט זיך רבי צוריקגעקערט לבית נאוה קודש אין וויליאמסבורג, מלא ברכות ה' איבערלאזנדיג הויפענעס חיזוק וחיות דקדושה פאר די באליבטע תלמידים ותושבי עיר קרית יואל.

בזמן שהצדיק בעיר הוא הודה זיוה והדרה!