*נקדמה פניו בתודה!*

אין א זעלטענעם שריט האט כ״ק מרן רבינו שליט״א געזאגט פאר באי ביתו אויפן וועג אהיים פון מחנה דברי יואל למעון קדשו קיין וויליאמסבורג, אז ער וויל תיכף אפשטאטן א באזוך אינעם *היכל ביהמ״ד בית מדרשו של רבי, זיך אומקוקן אויף די עבודת הקודש פון השלמת המלאכה* לקראת הימים טובים הבעל״ט.

אריינקומענדיג אין היכל האט *העסקן הדגול והנמרץ מוה״ר יואל בראווער הי״ו וואס שטייט בראש מלאכת הבנין* צוגעוויזן פארן רבין די טייערע אינגעלייט עושי המלאכה וואס ארבעטן רונדע דעם זייגער מיט מסירת נפש צו פארענדיגן די ארבעט כלול בהדרו.

רבינו שליט״א איז ארומגעגאנגן אינעם גאנצן היכל און געהערט א באריכט מיט אלע דעטאלן פון די בוי ארבעט, אלעס ארום וואס מען האט אריינגעלייגט קאפ און מח *ועל כולם מיליאנען דאללארן פארן שיינקייט און כבוד בית מקדש מעט און באקוועמליכקייט פארן ציבור*, וואס וועט דינען פאר שבתות וימים טובים חגים ומועדי השנה ושמחות בחצרות קדשינו, ובימות החול פאר חדרים לתפלה אויפן שענסטן פארנעם בעזהשי״ת.

באזונדער האט זיך רבינו שליט״א אפגעשטעלט אויף די מחיצות בעזרת נשים און באטראכט דעם מהלך וואס מען האט אריינגעלייגט סיי עס זאל זיין אויסגעהאלטן בצניעות און סיי די נשים צדקניות זאל געהעריג קענען מיטהאלטן פון אויבן דאס דאווענען כראוי.

ארויסגייענדיג שטארק באיינדרוקט פון די געוואלדיגע ארבעט וואס ווערט אראפגעלייגט צו קענען אי״ה פארענדיגן אויף די הייליגע טעג, *האט רבינו שליט״א מאציל געווען ברכת קדשו פון די עושי המלאכה אז מען זאל קענען גאנץ בקרוב זוכה זיין צום ותשלם כל המלאכה, מיט גרויסע השפעות צו קענען דעקן די געוואלדיגע הוצאות קרן הבנין*, און ארויסגעברענגט די זכי׳ וואס מען האט אז טויזענטער אידן זאלן קענען דאווענען די הייליגע טעג מיט הרחבת הדעת.

*בזמן שהצדיק בעיר היא הודה היא זיוה היא הדרה!*