פיבערהאפטיגע הכנות צום גרויסארטיגן "קרית יואל הדלקה" קומענדיגן ל"ג בעומר הבעל"ט – מאסיווע צוזאמפאר ערווארטעט פון צענדליגע טויזענטער אידן:
שטייענדיג ווייניגער ווי דריי וואכן ביז'ן גרויסן יו"ט ל"ג בעומר וועלכע געפאלט אויס דעם קומענדיגן זונטאג בחוקותי הבעל"ט, ווען רבבות אלפי ישראל גרייטן זיך אפּצורעכטן מיט א שמחה של מצוה און התרוממות הנפש די יומא דהילולא פון התנא האלקי רבן שמעון בר יוחאי זי"ע,
איז שוין אין די שטאט קרית יואל די מירון ד'אמעריקע אקטיוויזירט געווארן די מאסיווע פיבערהאפטיגע צוגרייטונגען צום "קרית יואל הדלקה" וועלכע איז אין לויף פון די לעצטערע יארן אויסגעשטיגן אלס די גרעסטע הדלקה אין חוץ לארץ ווען רבבות אידן פון אלע שיכטן און קרייזן קומען זיך צוזאם צום הייליגן התרגשות'דיגע מעמד תחת כיפת השמים בחצר הענקי שע"י ביהמ"ד הגדול אין קרית יואל, און ווערט אנגעצינדן מיט א שלהבת אש קודש דורכ'ן מנהיג העדה כ"ק אדמו"ר מסאטמאר שליט"א.
ספעציעל ווערט ערווארטעט דאס יאר טויזענטער מענטשן מער ווי א געווענליכע יאר, נאכדעם וואס עס איז פארהאן א רייע שוועריגקייטן אנצוקומען קיין אתרא קדישא מירון, צוליב די שווערע מלחמה צושטאנד בארצינו הקדושה.
אנדערש ווי אלע יארן ווען די מעמד ההדלקה קומט פאר בכניסת היום נאך מעריב און ספירה דורכ'ן רבי'ן שליט"א, וועט היי-יאר צוליב די שפּעטע שעה פון מוצש"ק, פארקומען די הדלקה ל"ג בעומר נאכמיטאג אום 6:00 אזייגער, ווען רבוא רבבות אידן פון אלע שיכטן און קרייזן איבער גרעיטאר ניו יארק, ניו דזשערסי, און די ארומיגע סטעיט'ס, ביז אזוי ווייט ווי קאנאדע וועלן מיטהאלטן די הייליגע געהויבענע מעמד מיט א אויסטערלישע שמחה הרוממה לכבודו פון התנא האלקי רשב"י זי"ע.די הויכפּונקט וועט זיין ווען דער רבי שליט"א וועט מדליק זיין את האור, און אנצינדן די מדורת אש באגלייט מיט א הייליגע פייער-פאקל אין די הערצער פון טויזנטער טויזנטער אידן וואס לאזן זיך ארויס מיט אן התלהבות דקדושה אין פייערדיגע ריקודין, ושמחה בוקעת רקיעים מיט א חסידישן ברען, זייענדיג א מעמד וואס איז כמעט נישט דא צו טרעפן איבער דער גארער וועלט, צו זען ווי אזויפיל טויזנטער און טויזנטער אידן, פרייען זיך אלע מיט מיט אזא אויסטערלישע שמחה וואס באגלייט יעדן איינעם אויף א גאנץ יאר.אשרינו מה טוב חלקינו בהילולא דבר יוחאי
גאלערי