וואשינגטאן. — די אמעריקאנער סופרים קארט גרייט זיך אויסצוהערן א וויכטיגע רעליגיעזע-פרייהייט קעיס וואס נעמט אריין אן ארטאדאקסישן איד, וועלכער זאגט אז די לאקאלע שטאטישע באאמטע האבן אים געשטערט פון אנגיין מיט א מנין אין זיין פריוואטע היים אין יוניווערסיטי הייטס, אהייא.

די העכסטע געריכט האט נאך אין יוני איינגעשטימט אויסצוהערן די קעיס וואס איז אריינגעגעבן געווארן דורך דניאל גרענד, אן ארטאדאקסישער איד וואס האט אנגעהויבן רופן זיינע שכינים צו זיך אינדערהיים פאר שבת'דיגע תפילות אין יאר 2021. לויט די געריכטליכע פאפירן, האבן די סיטי באאמטע נאכדעם ארויסגעגעבן א שטרענגע 'סיס ענד דעסיסט' ארדער, וואס האט אים פארארדנט אויפצוהערן נוצן זיין פראפערטי אלס א פלאץ פאר רעליגיעזע פארזאמלונגען אן האבן א ספעציעלע פערמיט דערפאר.

ר' דניאל טענה'ט אז די שריט פון די סיטי האט פאקטיש אפגעשטעלט זיין מעגליכקייט צו פראקטיצירן זיין רעליגיע און זיך צוזאמנעמען צו דאווענען. זיין קעיס האט דערגרייכט ביזן סופרים קארט נאכדעם וואס די אונטערשטע 'סיקס סירקוט' קאורט האט ארויסגעווארפן זיין קעיס, טענה'נדיג אז עס איז נאך נישט גרייט פאר א געריכטליכע אורטייל, וויבאלד די סיטי האט נאכנישט ארויסגעגעבן אן ענדגילטיגע באשלוס איבער די באנוץ פונעם פראפערטי.

די קעיס האט געצויגן גרויס אויפמערקזאמקייט פון פארשידענע אידישע ארגאניזאציעס. אגודת ישראל באמעריקע, די ארטאדאקסישע יוניאן (OU) און אנדערע גרופעס האבן אריינגעגעבן לעגאלע פאפירן אין שטיצע פונעם איד, בשעת אנדערע רעליגיעזע-פרייהייט ארגאניזאציעס האבן זיך אויך אריינגעמישט לטובת די קעיס.

עס איז וויכטיג צו באטאנען אז די סופרים קארט גייט דערווייל נאכנישט באשליסן צו גרענד האט למעשה א קאנסטיטוציאנאלע רעכט צו פירן דעם מנין ווי געפלאנט. די יעצטיגע פראגע וואס ליגט פאר די ריכטער איז בלויז צו מען קען בכלל קלאגן די רעגירונג פאר'ן סטראשען און שטערן רעליגיעזע רעכטן, אפילו אן דעם וואס די לאקאלע מוניציפאליטעט זאל קודם ארויסגעבן אן ענדגילטיגע באשלוס איבער די פראפערטי, ווי די אונטערשטע קאורט האט פארלאנגט.

די מינדליכע ארגומענטן אין די קעיס פון 'גרענד קעגן די סיטי אוו יוניווערסיטי הייטס' זענען באשטימט געווארן אויף דעצעמבער 9.