בג"ץ גיט פאר די רעגירונג אן ענדגילטיגע 90-טאג עקסטענשאן איבער די רעפארמער פלאזא ביים כותל

דאס העכסטע געריכט אין מדינת ישראל (בג"ץ) האט געגעבן פאר די רעגירונג א לעצטע עקסטענשאן פון 90 טעג צו געבן אן ענטפער איבער די לאנג-פארצויגענע געפעכט ארום די דרום זייט פלאזא ביים כותל המערבי.

דאס געריכט האט פארארדנט אז די שטאט מוז אריינגעבן אירע פלענער פאר די אזוי-גערופענע "עזרת ישראל" פלאזא און די צוטריט אראנדזשירונגען, ביז 90 טעג נאכדעם וואס די 38'סטע רעגירונג ווערט געשאפן.

די געריכטליכע קעיס קומט נאך פעטיציעס וואס זענען אריינגעגעבן געווארן דורך רעפארמער גרופעס און די פראוואקאטיווע "נשות הכותל", וועלכע פארלאנגען צו מאכן טוישונגען אין די סדרי התפילה אויפן ארט.

דער באשלוס לייגט ארויף א שטארקע פרעשור אויף די חרדי'שע פארטייען, וועלכע זענען שארף אקעגן סיי וועלכע טוישונגען וואס קענען חלילה פוגע זיין אין די מסורה'דיגע צורת התפילה און קדושת הכותל. די רעספאנס פון די גאווערנמענט וועט ווארשיינליך באשטימען די קומענדיגע פאזע אין דעם לעגאלן געפעכט.