צענלדיגע טויזענטער מענטשן קומען זיך צוזאם אפט אין דעם קליינעם הויז אין רחוב רשב"ם אין בני ברק. צווישן זיי איז אויך אריינגערעכנט הונדערטער רבנים און מנהיגי ישראל, וואס קומען אויף א טעגליכן פארנעם. דערפאר איז געווען גאר איבערראשענד ווען מרן שר התורה, כאטש וואס ער איז פיל עלטער פון דעם אריינקומענדיגן, דאך האט ער זיך אויפגעשטעלט לכבודו פון איינער פון די באזוכער, זאגנדיג אז ער איז מקיים דעם פסוק "מפני שיבה תקום"! דער גאס איז געווען הגאון הצדיק הרב אברהם הלוי אייזען שליט"א אב"ד פוזנא, און גרינדער פון די "ש"ס אידן כוללים נעטווארק", וועלכער איז געקומען צום שטוב פון מרן שר התורה רבי חיים קנייבסקי שליט"א פאר א פערזענליכע און אפיציעלע איינלאדענונג, צו באשיינעם דעם גרויסן מעמד וואו עס וועט אפגעצייכנט ווערן צען יאר זינט די גרינדונג פון די כוללים ש"ס אידן, וואס הגר"ח דינט אלס איר נשיא. דער גרויסער מעמד איז אפגעראכטן געווארן א וואך שפעטער אין דעם כתר הרימון זאל אין בני ברק מיטן באטייליגונג פון רבי חיים שליט"א און פילע גדולי התורה פון ארץ ישראל, דער מעמד זעלבסט פארדינט א באזונדערע ארטיקל. אין רעאקציע צום גרויס שאק פון רבי אברהם שליט"א אויף דעם וואס דער שר התורה האט זיך אויפגעשטעלט פאר אים, האט רבי חיים זיך מסביר געווען: "דאס איז פאר זיינע גרויסע לייסטונגען צו פארגרעסערן די תורה אין כלל ישראל, און אויפוואקסן צענדליגע אינגעלייט וואס זאלן קענען גאנץ ש"ס גמרא רש"י און תוספות. מען דארף זיך אויפשטעלן פאר פויזנער רב!". -- צום אפצייכענונג פון דעם צענטן יאר אין כולל ש"ס אידן, האט מרן שר התורה הגר"ח קנייבסקי שליט"ט געגעבן פאר הרב אייזען שליט"א דעם פאלגענדעם בריוו: בס"ד חשון תש"פ לאמיר מכיר טובה זיין פאר ידידינו אב"ד פוזנא הגר"א הלוי אייזען שליט"א, דערגרייכנדיג צען יאר זינט מ'האט געעפנט די כוללים ש"ס אידן, און אין די לעצטערע יארן האט ער מיר אויף מיין בקשה געעפנט נאך כוללים וואו צענדליגע אינגעלייט תלמידי חכמים לערנען דארט, וואס כשמו כן הוא, זיי קענען ש"ס בבלי מיט א קלארקייט, און איך האב זיי פארהערט עטליכע מאל און געפרעגט אפאר שאלות, און זיי האבן אויפן ארט געענטפערט. אויך מיין זוהן ר' שאול שליט"א האט זיי פארהערט א שעה אין גאנץ ש"ס און איז מורא'דיג נתפעל געווארן פון זייער ברייטע ידיעה, און ער האט געזאגט אויף זיי די גמרא אין קידושין ל' א' שאם ישאל לך אדם דבר אל תגמגם ותאמר לו אלא אמור לו מיד וכו'. דערפאר איז א גרויסע זכות צו מחזיק זיין די גרויסע תלמידי חכמים ביד רחבה, און די אלע וואס האלטן זיי אויס וועלן געבענטשט ווערן מיט אלע ברכות האמורות פאר מחזיקי תורה. חיים קנייבסקי.