נס: איבער 1,500 פאסאזשירן געראטעוועט אומבאשעדיגט נאך מאסיווע פייער אויף א צוג אין אינדיע

א מאסיווע פייער האט אויסגעבראכן אויפ'ן 'קארמאבהומי עקספרעס' (צוג נומער 12508) בעת ער איז געפארן פון אמריטסאר קיין ניו דזשאלפייגורי דעם 6'טן נאוועמבער 2026. די פאסאזשירן זענען געצווונגען געווען צו עוואקואירן דעם צוג נאכדעם וואס גרויסע פלאמען און א שווערע רויך האבן ארומגענומען עטליכע קאוטשעס.

לויט באריכטן ציטירט דורך 'טיימס נאו', האט זיך דאס פייער אנגעהויבן אין אן אלגעמיינעם קאוטש נעבן סאראי באנדזשארא אין די ראדזשפורא געגנט פון פונדזשאב, און האט זיך שנעל פארשפרייט צו פיר אנדערע קאוטשעס. ערשטע באריכטן צייגן אן אויף א מעגליכע עלעקטרישע 'שארט סירקוט', און די שטארקע ווינטן האבן ווארשיינליך געהאלפן פארשפרייטן די פלאמען. אויף ווידעא קליפס קען מען זען ווי שרעקליכע פלאמען און א געדיכטע שווארצע רויך קומען ארויס פון די פענסטערס פונעם פליענדיגן צוג.

באאמטע האבן באוויזן אפצושטעלן דעם צוג אין צייט, וואס האט געגעבן די מעגליכקייט פאר די פאסאזשירן צו אנטלויפן פון די ברענענדיגע קאוטשעס און זיך רוקן צו א זיכערע ארט. איבער 1,500 פאסאזשירן האבן זיך ארויסגעראטעוועט אן קיין שום וואונדן, און בחסדי שמים זענען נישט באריכטעט געווארן קיין פאטאליטעטן.

נאך די סוקסעספולע עוואקואציע, האבן די באאמטע אפגעטיילט די פארברענטע קאוטשעס פונעם איבריגן טייל פונעם צוג צו פארמיידן ווייטערדיגע שאדנס, און האבן אנגעהויבן צו ארגאניזירן אנדערע טראנספארטאציע מיטלען פאר די געשטראנדעטע פאסאזשירן. די אויטאריטעטן האבן געעפנט אן אפיציעלע אויספארשונג צו דערגיין פונקטליך ווי אזוי דאס פייער האט אויסגעבראכן און וואס האט געפירט צו איר שנעלע פארשפרייטונג. די מעגליכקייט פון א שארט סירקוט בלייבט דערווייל נאר אן ערשטע שאצונג ביז די אויספארשונג וועט זיך ענדיגן.

דער אינצידענט האט אויפגעברענגט ערנסטע זארגן איבער די פייער זיכערהייט אויף פאסאזשיר צוגן, בפרט די סכנה ווען פלאמען פארשפרייטן זיך אין פולע קאוטשעס אינמיטן א רייזע. טראץ די שרעקליכע פלאמען וואס מ'זעט אויף די בילדער, האט דער פראמפטער אפשטעל פונעם צוג און די שנעלע עוואקואציע פארמיטן א טראגעדיע. מען ערווארטעט אז די רעזולטאטן פון די אויספארשונג וועלן קלארמאכן די אורזאך און אנווייזן אויף פרישע זיכערהייט מיטלען וואס דארפן ווערן איינגעפירט.