מדינת ישראל ווארנט די בריטישע רעגירונג: "ענקערע פאליסיס שטעלן אין געפאר די זיכערהייט פון בריטישע בירגער"

א ווארטזאגער פארן אפיס פונעם מדינת ישראל פרעמיער מיניסטער, דורון שפילמאן, האט שארף קריטיקירט די נייע בריטישע 'לעיבאר' רעגירונג פאר זייערע פאליסיס, וואס לויט אים אונטערגראבט עס די קריטישע זיכערהייט קאאפעראציע צווישן די צוויי לענדער.

אין א פרישע אויפטריט האט שפילמאן אנגעוויזן אז די בריטישע זיכערהייט אגענטורן האבן שוין עטליכע מאל אנערקענט די וויכטיגקייט פון די מדינת ישראל אינטעלידזשענס, וואס העלפט פארהיטן טעראר אטאקעס און ראטעוועט בריטישע לעבנס יעדעס יאר. ער האט אראפגעריסן די שריט פון די רעגירונג אלס "אבסורד", נעמענדיג אין באטראכט די פראקטישע בענעפיטן וואס ענגלאנד באקומט פון די שותפות.

ער האט קלארגעשטעלט אז מדינת ישראל שטעלט צו קריטישע הילף קעגן טעראר אין א צייט וואס די סטראשונגען פון איראן, חיזבאללא און אנדערע טעראר נעצן זענען גאר אקטיוו. "דורך נעמען שריט וואס שטערט די דיפלאמאטישע און זיכערהייט באציאונגען, לייגט די לעיבאר רעגירונג אין א סכנה א קשר וואס ברענגט קאנקרעטע בענעפיטן פאר די זיכערהייט פון בריטישע בירגער," האט שפילמאן געווארנט.

די קאמענטארן קומען אין א צייט פון א שארפע אנגעצויגנקייט אין די אפיציעלע באציאונגען צווישן די צוויי לענדער. דאס קומט נאכדעם וואס ענגלאנד האט באשלאסן ארויפצולייגן סאנקציעס אויף פראדוקטן וואס קומען פון די אידישע זידלונגען אין די וועסט בענק.

אלס רעאקציע האט מדינת ישראל גענומען שטרענגע שריט: זיי האבן פארמאכט דעם בריטישן קאנסולאט אין ירושלים, ארויסגעווארפן בריטישע פערסאנאל פון געוויסע קאארדינאציע ראלעס, אפגעשטעלט טרענירונג פראגראמען פאר די פאלעסטינער אויטאריטעט (PA) קרעפטן, און פארבאטן עטליכע בריטישע באאמטע פון אריינקומען אין לאנד. מדינת ישראל באאמטע האבן אנגערופן די שריט אלס א נויטיגע ענטפער צו וואס זיי זעען אלס א "פיינטליכע און איינזייטיגע פאליסי."

שפילמאן און אנדערע מדינת ישראל פארשטייער האבן כסדר געמאכט א קלארע חילוק צווישן די לעיבאר רעגירונג און דאס בריטישע פאלק, וואס לויט זיי שטיצן רוב בירגער ווייטער א נאענטע קשר מיט מדינת ישראל. אבער זיי האבן געווארנט אז פאליטישע באשלוסן אין לאנדאן קומען מיט א טייערע פרייז פאר די זיכערהייט קאאפעראציע.

כאטש בריטישע מיניסטארן האבן פארזיכערט אז די אינטעלידזשענס קאאפעראציע איבער אישו'ס ווי איראן וועט אנגיין ווי געהעריג, זענען געוועזענע זיכערהייט באאמטע שטארק באזארגט איבער די לאנג-טערמין עפעקטן פון דעם דיפלאמאטישן קריזיס.

די יעצטיגע געפעכט ברענגט ארויס די אנגעצויגנקייט צווישן פאליטישע שריט און פראקטישע זיכערהייט געברויכן. פאר ענגלאנד איז דער צוטריט צו הויכע-קוואליטעט אינטעלידזשענס פון א מעכטיגע שותף אין די מיטל-מזרח שטענדיג געווען א גרויסע געווינס. שפילמאן'ס רייד דינען אלס א דערמאנונג אז די באציאונגען ראטעוועט לעבנס, און די קומענדיגע מאנאטן וועלן אויספרובירן צי מען קען באהאנדלען די פאליטישע חילוקי דעות אן איבערלאזן א בלייבנדע שאדן אויף די זיכערהייט קשר.