וויצע פרעזידענט דזשעי די ווענס: מדינת ישראל באקומט נישט קיין 'בלענק טשעק' פון אמעריקע; אמעריקאנער אינטערעסן קומען ערשט

וויצע פרעזידענט דזשעי די ווענס האט קלארגעשטעלט אז מדינת ישראל באקומט נישט קיין "בלענק טשעק" פון די פאראייניגטע שטאטן, זאגנדיג אז די אמעריקאנער פאליסי אין מיטל מזרח קען נישט זיין אונטערווארפן צו די מדינת ישראל רעגירונג.

ניצנדיג ווערטער וואס דערמאנען פרעזידענט טראמפ'ס צוגאנג צו די 'נאטא' אליאנץ, האט ווענס אונטערגעשטראכן אז אמעריקע וועט קאאפערירן מיט אירע אליאירטע ווען די אינטערעסן שטימען, אבער וועט זיך נישט קווענקלען צו גיין אין אן אנדערע ריכטונג ווען ס'פעלט אויס, און וועט אלעמאל לייגן אמעריקע'ס אייגענע אינטערעסן אויבן אן. ער האט ארויסגעברענגט אז כאטש אליאנצן זענען וויכטיג, זענען זיי צווייטראנגיג צו אמעריקע'ס נאציאנאלע פריאריטעטן. ער האט אפגעווארפן סיי וועלכע געדאנק אז אן אנדער לאנד'ס אגענדע זאל איבערנעמען די אמעריקאנער באשלוסן.

די רייד זענען א קלארע אפשפיגלונג פון די אדמיניסטראציע'ס "אמעריקע פוירסט" פאליסי, און צייגט אז זיי זענען ווייטער גרייט זיך צו טיילן מיט די מדינת ישראל פאזיציעס ווען די צוויי זייטן זענען נישט אויפן זעלבן בלאט.

די יעצטיגע קאמענטארן פון ווענס קומען אין צוגאב צו זיינע פריערדיגע סטעיטמענטס, וואו ער האט געלויבט טראמפ'ס גרייטקייט זיך צו קריגן מיט די מדינת ישראל פירערשאפט איבער פארשידנארטיגע אינטערעסן, און האט שטארק קריטיקירט דאס אז פרעמדע לענדער זאלן האבן אן איינפלוס אויף אמעריקאנער פארהאנדלונגען. דורכ'ן מאכן א דירעקטע פארגלייך צו נאטא, האט ער אוועקגעשטעלט די באציאונגען מיט מדינת ישראל אלס א וויכטיגע זאך, אבער באגרעניצט מיט דעם זעלבן פרינציפ אז קיין שום אליאירטע באקומט נישט קיין אטאמאטישע אונטערטעניגקייט.

די שטעלונג ברענגט ארויף פראגעס ווי אזוי דאס וועט זיך אויסשפילן למעשה אין די יעצטיגע דיפלאמאטישע פארהאנדלונגען אינעם ראיאן, מיליטערישע קאארדינאציע, און ביי קומענדיגע מיינונגס-פארשידנהייטן. פאליטישע אנאליסטן וועלן יעצט האלטן א נאנטע אויג צו זען פונקטליך וואו די אדמיניסטראציע וועט ציען די ליניע צווישן שותפות און זעלבסטשטענדיגקייט אין די קומענדיגע מאנאטן.