אבל יחיד עשי לך – כולל חצות באוויינט דעם גרויסן אבידה | תושבי צפת וועלן זיך בענקן נאך זיין שמייכל | אלע ציבראכענע מירונ'ער תושבים קענען זיך נאך נישט בארואיגן | האט איבערגעלאזט דריי קינדער און א ציבראכענע אלמנה עיה"ק צפת תובב"א: שטייענדיג תוך שלשים יום פון די פטירה פון אחד ומיוחד מבני החבורה פון די כולל חצות אין אתרא קדישא מירון הרה"ג רבי שמואל בנימין סופר ז"ל, וועלכע איז ליידער טראגיש אוועקגעריסן געווארן פון אונז דעם פארגאנגענעם דינסטאג פרשת שמות פארטאגס, פילן מיר אלס חוב איהם צו באוויינען ברבים אין די ראמען פון די ארטיקל. ווי אויך ארויסצוצייגן פאר כלל ישראל די דערהויבענע מעלות און אויסטערלישע מדריגות פונעם חשוב'ע נפטר ז"ל, כדי חלילה נישט פאררעכנט צו ווערן אינעם כלל פון "כל המתעצל בהספדו של חכם" (שבת קה:), נאר אדרבה ארויסברענגן זיין הפלא'דיגן פערזענליכקייט און ארויסהייבן זיינע נאבעלע טאהטן, פון וועלכע מען קען אסאך ארויסלערנען, און עס וועט אוודאי גערעכנט ווערן פאר איהם לזכרון טוב און פארשאפן א נייחא לנשמתו בעלמא דקשוט. תורה עבודה וגמילות חסדים ר' שמואל בנימין ז"ל איז געווען אן אמת'ע בן עליה פונעם העכסטן קאליבאר, א רעכטער עובד ה' בכל לב ונפש מיט אן אהבת תמים ויראה פנימית, און א פלאם-פייערדיגן חסיד וועלכע האט אויפגעלאכטן און אנגעווארעמט אלע זיינע ארומיגע. דארטן אינעם הייליגן אור-אלטע שטאט צפת ת"ו האט זיין לעכטעלע אזוי הערליך געשיינט; אין אירע ציכטיג ריינע לופט האט ער זיך געווייקט בטהרה, און אויף אירע נאסטאלאגישע געסעלעך זיך דערהויבן גבוה מעל גבוה. זיין עבודה שבלב זו תפילה איז געוועהן ווי די חסידים הראשונים מיט א כובד ראש און כוונה רצויה, קלאר און פאמעליך מיט א מתינות און מתיקות. און אין-צוגאב צו די געווענליכע תפילות פלעגט ער אין די לעצטע יארן מסיים זיין גאנץ ספר תהלים דבר יום ביומו, ביים הייליגן ציון המצויינת פונעם תנא האלקי רבי שמעון בן יוחאי ע"ה. ווי אויך האט ער זיך כל ימיו ממית געוועהן באהלה של תורה במסירות נפש של ממש, און זוכה געוועהן לראות ברכה בעמלו, ווען ער איז אויסגעשטיגן אלס א תלמיד חכם מופלג און א ידען עצום בכל חלקי התורה. טרערן האבן זיך געגאסן ווען יבלחט"א זיין חשוב'ע זוהן שליט"א האט ביים לוויה דערציילט, אז זיין פאטער די נפטר ז"ל פלעגט יאר נאך יאר מאכן א סיום אויף גאנץ ש"ס, במעמד כל בני משפחתו הרוממה שיחי', אין דעם הייליגן און לויטערן סדר נאכט – ליל התקדש חג הפסח. א זאך וואס אויסער די נאנטע משפחה מיטגלידער האט קיינער פון דעם נישט געוויסט. זיין לייב און לעבן פלעגט ער אוועקגעבן פאר אנדערע אויף א טאג-טעגליכע פארנעם. צום ערשט אינעם הייליגן פעלד פון חינוך, אין וועלכע ער איז געוועהן ברייט באקאנט אלס מלמד מומחה פאר לאנגע יארן אין תלמוד תורה ברסלב אין צפת ת"ו, און זוכה געוועהן אויפצושטעלן עדרי צאן קדשים לשם ולתפארת. און ווי אויך מיט די פעולות נשגבות לכל דכפין ולכל דצריך, זייענדיג א רודף צדקה ועושה חסד מיט זיין ברייטע נאטור און גאלדענע הארץ. זיין ליבליך שמייכל און הערצליכע ווארימקייט האבן אויפגעלאכטן די געמיטער פון אומצאליגע אידן וואס האבן גענויטיגט אין חיזוק. מיט זיין ענדלאזע קוואל פון אמונה און בטחון האט ער געהויבן די גייסט פון צובראכענע נפשות, און זיי מחיה געוועהן מיט זיינע טרעפליכע רייד און פערל-ווערטער. אסאך אידן וועלן ליידער שפירן אויף די אייגענע הויט די גרויסע חלל וואס די גוטהארציגע ר' שמואל בנימין ז"ל האט נעבעך אזוי פריצייטיג איבערגעלאזט. שבר על שבר הושברנו גאר א שטארקע קלאפ איז דאס פאר כולל חצות, ממש אן אבידה שאין לה תמורה, א ריס אין הארץ וואס קען נישט פארראכטן ווערן. ר' שמואל בנימין ז"ל איז געוועהן פון די סאמע לייבן אין די הייליגע חבורה, זייענדיג א מיטגליד אין דעם דערהויבענעם קבוצה פון כולל חצות אין אתרא קדישא מירון פונעם טאג וואס די כולל איז געגרונדעט געווארן. ר' שמואל בנימין ז"ל איז געוועהן א 'חצות איד' במלוא מובן המילה, זעקס טעג - אדער בעסער געזאגט נעכט - א וואך! און אויסער געציילטע פעלער פון גאר נאנטע שמחות ביים איהם אין משפחה, האט ער קיין שום נאכט נישט פארפעלט, און קיינמאל נישט פארשפעטיגט. נאר ווי די שטייגער פון די כולל חצות אידן, איז ער יעדן מיטל-נאכט ערשינען מיט זיין בא'חן'טע שמייכל און אויפגעפרישטע געזיכט, און זיך תיכף ומיד געזעצט מיט זיין חברותא און געלערנט מיט א סדר, גמרא בבלי וירושלמי און דערנאך פרקי משניות וספרי חסידות, ביז ווען די זוהן שטראלן האבן זיך באוויזן אויפן האריזאנט. דאס אז ער איז געוועהן א מיטגליד אין די הייליגע חבורה פון כולל חצות אין אתרא קדישא מירון ת"ו, מאכט געוויס דאס ביטערע פארלוסט פאר אן אבידת הכלל. עס איז דאך קיין שום ספק נישט, אז אט די דערהויבענע עבודת הקודש פונעם חשוב'ן נפטר ז"ל באישון לילה ואפילה, האט באשיצט די וועלט בכלל און תושבי ארה"ק ויושבי גליל בפרט מיט א שמירה עליונה, ווי עס ווערט געברענגט אין זוהר הק' ועוד, און האט אויפגעלאכטן די פינסטערניש פונעם נאכט מיט אן אומגעהויערע ליכטיגקייט, ועל זה ידוו כל הדווים. רעדנ'דיג פון כולל חצות, איז כדאי צו באטאנען דאס וואס עס זאגט עדות די ענערגישע מיסד און יושב ראש פון כולל חצות הרה"ג רבי נחמי' האפפמאן שליט"א, אז פאר א יעדן יום טוב האט ער ערהאלטן א פערזענליכן טעלעפאן רוף פון להבחל"ח ר' שמואל בנימין ז"ל אין וועלכע ער האט זיך גאר הערצליך באדאנקט אויף די מסירות-נפש'דיגן אויפגאבע פונעם געטרייע מנהל צו דעקן די בודזשעט מדי חודש בחדשו, אין עקסטער זיך באדאנקט פאר די הוספות פאר יום טוב. ער האט שטענדיג צוגעלייגט א הויפן פון דברי חיזוק מיט זיין אייגנארטיגן שפראך, דערביי ארויסברענגנדיג די דערהויבענע געפילן וואס ער און זיינע חברים שפירן זייענדיג פון די "עבדי ה' העומדים בבית ה' בלילות", און ווי שטאלץ זענען זייערע איבערגעגעבענע שותפות לדבר – די נשים צדקניות וועלכע חלק כחלק יאכלו. ער האט שטענדיג צוגעענדיגט אז ער דאווענט טעגליך ביים ציון הקדוש אין מירון להצלחתו פון רבי נחמי' שליט"א און די הנהלת הכולל, און-צוגאב צו די הזכרות פון די תומכי הכולל מכל קצוי תבל, וועלכע ער פלעגט דערמאנען מיט א זעלטענע ערנסטקייט און שטארקע געפיל, און ממש אויסגיסן זיין הארץ פאר זייער ישועות און השפעות, סיי טעגליך ביים ציון הקדוש אין מירון, און סיי און די ספעציעלע זמנים ביים אר"י הקדוש אין צפת און ביי רבי יונתן בן עוזיאל אין עמוקה און נאך פילצאליגע מקומות מסוגלים, להוושע בדבר ישועה ורחמים. בליל זה יבכיון ליידער ליידער איז אט די לייכט-טורעם פארלאשן געווארן אזוי פלוצלינג און אזוי טראגיש. געוועהן איז עס יענער פינסטערע דינסטאג האלב נאך צוויי פארטאגס, אהיים קומענדיג פון א חתונה ביי זיין שוועסטער'ס א קינד אין בית שמש, ווען זייענדיג קוים פינעף מינוט אוועק פון זיין הויז, האט ער פארלוירן קאנטראל פון זיין קאר און איז געווארן פארמישט אין א שוידערליכע עקסידענט ה"י. ווען די פאראמעדיקס זענען אנגעקומען צום סצענע האט זיך ארויסגעשטעלט דאס ערגסטע, אז ליידער האט די רוח החיים פון עיה"ק צפת ת"ו, די פה המתגבר בתורה בין כותלי כולל חצות, די זעלטענע לב טוב און בעל מידות תרומיות, דער 'בעל תפילה' פון כלל ישראל, צוריקגעגעבן זיין לויטערע נשמה פארן הייליגן באשעפער, צו רוהן אונטער זיין ליבליך שוץ און לערנען תורה מיט די נשמות הצדיקים. טאקע אין די שעה וואס ער פלעגט שטענדיג לערנען במסגרת כולל חצות מיט אן אומבאשרייבליכן חשקת התורה כחד מקמאי, אט אין די זעלבע צייט "בהאי קטירא איתקטר", מיט די קשר האט ער זיך פארבינדן צום חי עולמים מיט א נצחיות'דיגן קשר של קיימא, להתענג על ה' וליהנות מזיו שכינתו. ווען די ביטערע ידיעה איז אנגעקומען צו זיינע חברים אין כולל חצות, האט זיך א שווארצע וואלקן פון אבלות דערקענט אין יעדן ווינקל, און די טיפע טרויער איז נישט צו באגריפן. פון דעסטוועגן האבן די רבני הכולל זיך געשטארקט כדי צו קענען א טובה טוהן פאר זיין נשמה, און האבן אינאיינעם אריבערגעפארן צום זיו שפיטאל ווי די נפטר איז געלעגן, און סביב למיטתו האבן זיי תהלים געזאגט פאר עטליכע שעה ביז ווי לאנג די לוויה האט זיך אנגעהויבן. ליל ששי אינעם וואך פון די שבעה, איז פארגעקומען אן עצרת הספד והתעוררות אינעם כולל, ווי די רבני הכולל האבן אויסגעזאגט גאנץ ספר תהלים לעילוי נשמתו, און דערנאך האבן זיי געהערט דברי הספד והתעוררות פון הרה"ג רבי שמעון האלפערן שליט"א ראש הכולל, הרה"ג רבי דוד זאב רייך שליט"א רב דקהילת צאנז בעיה"ק צפת ת"ו ומרבני כולל חצות סניף מירון, און הרה"ג המשפיע רבי אביש ציינווירטה שליט"א, וועלכע האבן אויפגעטרויטן מיט פאסיגע דיבורים איבערן צו השעה. ומכאן הקול יוצא צום שלוס, ווענדט זיך די הנהלת כולל חצות מיט א הייסע רוף צו אחינו בני ישראל רחמנים בני רחמנים, אז היות וואס די חשוב'ע נפטר ז"ל האט אויפגעשטעלט א הערליכע שטוב פון צען קינדער, און נאך אין שטוב אן אלמנה מיט דריי קליינע קינדער - צוויי פון זיי וועלכע זענען געשעדיגט געווארן ביים עקסידענט און ווארטן אויף זייער גענצליכע ערהוילונג בס"ד - און עס איז ליידער נישטא ווער עס זאל יעצט ברענגן פרנסה אין שטוב, דעריבער בעטן זיי פון ישראל קדושים הנתבעים ונותנים, ארויסצוהעלפן און שטיצן מיט א ברייטע הארץ און אפענעם האנט פאר די צובראכענע משפחה. ומה כאן היה עומד ומתפלל פאר אזויפיל אידישע בקשות, אף שם עומד ומתפלל פאר כלל ישראל, און וועט אוודאי מכיר טוב און מליץ יושר זיין פאר אלע וואס העלפן זיינע יתומים'לעך להוושע בדבר ישועה ורחמים. שיקט אריין אייער ברייטהארציגע נדבה צו KOLLEL CHATZOS C/O SOFER FAMILY, און מיר וועלן אייך מזכיר זיין ביי זיין פרישן קבר, און הקב"ה וועט בשכר זה ממלא זיין כל משאלותיכם במידה טובה ישועה ורחמים. יהא זכרו ברוך. איר קענט שיקן אייער נדבה צו כולל חצות 46 main St. #104 monsey ny 10952