בארא פארק: 14-יעריגער בחור געשטאכן געווארן אין א לאקאלן בית מדרש; פארדעכטיגטער ארעסטירט

א 14-יעריגער בחור איז מאנטאג אוונט געשטאכן געווארן אינעווייניג אין א בית מדרש אין בארא פארק, און די פאליציי האט ארעסטירט א 22-יעריגן פארדעכטיגטן נאכן אינצידענט.

לויט לאקאלע באריכטן האט דער אינצידענט פאסירט ארום 7:20 אין אוונט, אין ביהמ"ד קהל קדושת יוסף ווערדאן אויף 54'סטע סטריט נעבן 17'טע עוועניו.

די אויטאריטעטן געבן איבער אז דער 22-יעריגער האט זיך באנוצט מיט א שארפן אינסטרומענט און געשטאכן דעם בחור אין די האנט. די פאליציי איז אראפגערופן געווארן צום ארט נאך א 911 רוף איבער א גייסטיש-געשטערטער פערזאן אינעווייניג אינעם שול.

דער פארדעכטיגטער איז ארעסטירט געווארן אויפן ארט אן קיין ווייטערדיגע פראבלעמען. דער 14-יעריגער בחור האט אפגעזאגט מעדיצינישע באהאנדלונג אויפן סצענע.

די פאליציי זאגט אז סיי דער בחור און סיי דער פארדעכטיגטער זענען מתפללים פונעם בית מדרש. עס איז דערווייל נישט קלאר וואס האט געפירט צום אינצידענט, און די אומשטענדן ארום די שטעכעריי זענען ווייטער אונטער אן אויספארשונג.